Prokurorët e Hagës shqyrtojnë kombinimin e gjyqeve të Karaxhiçit dhe Mlladiçit
31/05/2011
HAGE, Hollandë -- Zyra e prokurorisë së gjykatës së Hagës po mendon rreth kombinimit të gjyqit të ish-komandantit serb boshnjak Ratko Mlladiç me atë të ish-udhëheqësit politik serb boshnjak Radovan Karaxhiç, tha të hënën (30 maj) këshilltari politik i prokurorisë Frederik Svinen. Ai vuri në dukje se të gjitha mundësitë po shqyrtohen për momentin, por nuk është marrë asnjë vendim. Gjyqi i krimeve të luftës i Karaxhiçit nisi më 2009, ndërsa ekstradimi i Mlladiçit në Hagë është në pritje. Një gjykatë në Serbi të martën kundërshtoi një apel të paraqitur nga avokati i Mlladiçit, Milosh Saljiç, i cili tha se klienti i tij është tepër i sëmurë për të dalë në gjyq. (Beta, B92, Tanjug, Politika - 30/05/11)
Peter Sorensen do të drejtojë delegacionin e BE-së në BiH
31/05/2011
BRUKSEL, Belgjikë -- Diplomati danez Peter Sorensen është emëruar si kreu i delegacionit të BE-së në Sarajevë, njoftoi të hënën (30 maj) shefja e politikës së jashtme të BE-së Kethrinë Eshton. Vendimi vjen pas një vendimi të këshillit të ministrave të BE-së në mars për të forcuar praninë e BE-së në Bosnjë dhe Hercegovinë (BiH). Veprimi pason gjithashtu vizitën e fundit të Eshtonit në Banja Lukë, ku ajo i bindi udhëheqësit për të mos zhvilluar një referendum mbi gjyqësorin boshnjak. Emërimi i Sorensenit vjen në një kohë vendimtare për rajonin e Ballkanit Perëndimor dhe BiH-në në veçanti, tha Eshton në deklaratën e saj. Sorensen tani drejton delegacionin e BE-së në Shkup. (Radio Free Europe, RTRS, MIA - 30/05/11)
Fermerët serbë protestojnë kundër shkurtimeve të subvencioneve
31/05/2011
BEOGRAD, Serbi -- Një shoqatë fermerësh nisi protestat të hënën (30 maj) pasi qeveria vendosi të shkurtojë subvencionet bujqësorë. Fermerët nga Vojvodina u drejtuan për në Beograd dhe bllokuan disa rrugë pranë Pançevës, por u ndaluan nga policia që të mbërrinin në kryeqytet. Prodhuersit bujqësorë kërkojnë që qeveria të ruajë nivelin e 2010-tës për financimet, kur ata morën 144 euro për hektar për deri në 100 hektarë tokë të punueshme. Qeveria vendosi t'i mbajë subvencionet në 14,000 dinarë, por kufizoi sasinë e tokës deri në dhjetë hektarë, në një përpjekje për të shkurtuar shpenzimet publikë. (RTS, B92 - 30/05/11)
Daçiç thotë se Serbia nuk përballet me pezullimin e rregjimit pa viza
31/05/2011
BRUKSEL, Belgjikë -- Ministri i Brendshëm serb Ivica Daçiç merr pjesë në një informim të martën (31 maj) në Bruksel për ekspertët e vizave të misioneve të vendeve të BE-së. Të hënën, ai u takua me Komisioneren e Punëve të Brendshme të BE-së Sesilia Malmstrom për të diskutuar mbi çështjen e vizave. Pas bisedimeve, ai përsëriti se rregjimi pa viza i BE-së për Serbinë nuk është në rrezik për momentin dhe shprehu vendosmëri për të vazhduar zbatimin e masave që kanë për qëllim parandalimin e shpërdorimit të vizave. Javën e shkuar, Komisioni Europian (KE) propozoi futjen e neneve mbrojtës që do të lejonin rifutjen e përkohshme të vizave për shtetasit e një vendi të tretë. Mekanizmi do të zbatohej sipas disa kushteve të jashtëzakonshëm dhe si një mjet i fundit. KE po bisedon me autoritetet në Serbi dhe Maqedoni për të gjetur mënyrat për të zvogëuar numrin e azil-kërkuesve. (Tanjug, Blic - 30/05/11)
Planet e privatizimit ndezin më shumë protesta në Greqi
31/05/2011
ATHINE, Greqi -- Portet do të bllokohen për katër orë të martën (31 maj) për shkak të protestave nga punëtorët kundër planeve të privatizimit të qeverisë. Punëtorët e portit do të mblidhen jashtë Ministrisë së Marinës Tregtare në Athinë. Të hënën, rreth 300 punonjës të telekomit OTE bllokuan hyrjen e zyrave të ndërmarrjes në qendër të kryeqytetit për të protestuar kundër planeve të qeverisë për t'a privatizuar atë. Punonjësit në Hellenic Postbank, e cila është gjithashtu në listën e privatizimeve, kanë njoftuar një grevë 24-orëshe të martën pas marshimit në Athinë të hënën. (Imerisia, Eleftherotypia, Nafthemporiki, Ethnos, Kathimerini - 31/05/11)
Kosovarë shpallen fajtorë për trafik droge dhe krim të organizuar
31/05/2011
PRISHTINE, Kosovë -- Një trup i përbërë nga dy gjyqtarë të Kosovës dhe një gjyqtar të EULEX-it në Gjykatën e Qarkut të Prishtinës dënuan tre vetë të hënën (30 maj) në një çështje lidhur me trafikun e drogës dhe krimin e organizuar. I pandehuri Iliaz Kurtaliqi u shpall fajtor për blerjen e 7.5 kg heroinë nga Faik Mazreku dhe përpjekjen për t'a kontrabanduar atë në Zvicër. Dy të tjerë mbeten në kërkim. Kurtaliqi dhe Mazreku e pranuan fajin dhe morën përkatësisht dënime prej gjashtë vjet e nëntë muaj dhe katër vjet e gjysmë. Bashkëfajtorja Shyhrete Hasani u shpall fajtore dhe u dënua me 18 muaj burgim. Ata u gjobitën gjithashtu me gjithsej 35,000 euro. (Kohavision, Klan Kosova - 30/05/11)
Në rrezik marrëveshja e Kosovës me FMN
31/05/2011
PRISHTINE, Kosovë -- Kosova është në rrezik të prishjes së marrëveshjes së saj me FMN më pak se dy vjet pas fitimit të anëtarësisë në të. Përkeqësimi në marrëdhënie rrjedh nga shpërfillja prej qeverisë e rekomandimeve të FMN-së për të drejtuar politikat e zhvillimit që do të nxisin rritjen ekonomike. Të martën (31 maj) media citoi një blog nga ish-kreu i njësisë ekonomike në Zyrën Civile Ndërkombëtare (ICO) Andrea Kapusella, ku ai tha se programi i Kosovës me FMN nuk është në rrugën e duhur, duke e përshkruar atë si një dështim për vendin. Sipas Kapusellës, është e rrallë që qeveritë të shkelin angazhimet e tyre ndaj FMN-së. Ai tha gjithashtu se FMN po pret që të njoftojë zyrtarisht prishjen e marrëveshjes me Kosovën. Pagat e shumicës së punonjësve të sektorit publik janë rritur që nga janari, siç premtoi Partia Demokratike në pushtet gjatë fushatës zgjedhore. (Express, Zeri, Koha Ditore - 31/05/11)
Shqipëria renditet e dyta në Europë për nivelin e pirjes së duhanit
31/05/2011
TIRANE, Shqipëri -- Shqipëria është vendi me numrin e dytë të pirësve të duhanit në Europë pas Turqisë, sipas shifrave të botuara nga Instituti i Shëndetit Publik në Tiranë për të shënuar Ditën Botërore Pa Duhan, të martën (31 maj). Të dhënat sugjerojnë se 40% e shtetasve shqiptarë pijnë rregullisht duhan. Specialisti Roland Shuperka thotë se prirja më shqetësuese është rritja e numrit të konsumatoreve të reja femra. Sipas tij, gratë e qyteteve pijnë rreth 2.5 herë më shumë se ato të zonave rurale. (Telegrafi, Ora News, ABC News - 30/05/11)
Zhvendosjet bëjnë që koalicioni në pushtet i Rumanisë të humbasë shumicën e senatit për pak kohë
31/05/2011
BUKURESHT, Rumani -- Koalicioni në pushtet i Partisë Liberale Demokratike (PDL) dhe Aleancës Demokratike të Hungarezëve rivendosi të hënën (30 maj) shumicën e tij në senat, pasi i pavaruri Jon Toma kaloi në grupin e Bashkimit Kombëtar për Përparimin e Rumanisë, që mbështet koalicionin. Më parë gjatë ditës, Senatori Sherban Radulesku njoftoi se po largohej nga grupin parlamentar i PDL-së, duke bërë kështu që koalicioni të humbiste shumicën e tij. Pas largimit të Tomës, koalicioni në pushtet do të ketë 69 nga 137 senatorë. Partia Social Demokratike dhe Partia Kombëtare Liberale të opozitës kanë gjithsej 68 senatorësh, por Katalin Voiku është tani nën arrest për akuza korrupsioni, gjë që bën që në fakt grupi të ketë 67 vota. (Hotnews.ro, Romania Libera, Realitatea, Ziare - 30/05/11)
Davutoglu i Turqisë thotë se qeveria nuk mund të parandalojë një flotilje tjetër ndihme për në Gaza
31/05/2011
ANKARA, Turqi -- Qeveritë demokratike nuk mund të ndalin shtetasit për të dërguar një flotilje të re ndihme humanitare në Gaza, tha të hënën (30 maj) Ministri i Jashtëm Ahmet Davutoglu, një vit pasi një anije turke u sulmua nga komandot izraelitë, duke lënë gjashtë veprimtarë turq të vdekur. Deklarata e tij ishte në përgjigje të Sekretarit të Përgjithshëm Ba Ki-mun, i cili të premten u kërkoi qeverive që të bindin veprimtarët që të heqin dorë nga planet për të dërguar një flotilje të dytë ndihme. "Asnjë vend demokratik nuk mendon se ka kontroll të përgjithshëm mbi OJQ-të," pohoi Davutoglu. OJQ-të po planifikojnë flotiljen e dytë muajin e ardhshëm. (Hurriyet, Internet Haber- 30/05/11)
Erdogan i Turqisë viziton Gjeorgjinë
31/05/2011
TBILISI, Gjeorgji -- Kryeministri turk Rexhep Tajip Erdogan do të jetë në Gjeorgjinë fqinjë të martën (31 maj) për të ndjekur ceremoninë e përurimit të një kalimi të ri kufitar. Të dy vendet pritet që të nënshkruajnë një marrëveshje që lehtëson rregjimin e vizave për shtetasit e tyre, që do të hyjë në efekt në korrik. (Anadolu news agency, Trend, Hurriyet - 30/05/11)