Kosova kërcënon për forcë nëse provokohet nga strukturat paralele serbe

08/09/2010

PRISHTINE, Kosovë -- Autoritetet në Kosovë janë zotuar që të përgjigjen me forcë ndaj çdo provokimi nga strukturat paralele të paligjshme serbe në Kosovën e veriut. Reagimi të martën (7 shtator) nga ministria e brendshme erdhi një ditë pasi zyrtarë të lartë serbë të punëve të brendshme ranë dakort në një takim në Zveçan, pranë Mitrovicës, që të intensifikojnë patrullat dhe ndoshta të bëjnë sulme kundër njësive të policisë speciale të Kosovës, nëse ato shfaqen në veri. "Nëse bëhemi objekt i ndonjë sulmi, do të përgjigjemi me të njëjtën gjuhë," tha të martën Ministri i Brendshëm i Kosovës Bajram Rexhepi. Ai shtoi se policia e Kosovës, EULEX dhe KFOR kanë aftësinë për të ruajtur sigurinë, ligjin dhe rendin.

Ndërkohë, Shoqata e Bashkive Serbe të Kosovës miratoi një deklaratë në Zveçan të martën në mbrojtje të Kosovës si pjesë përbërëse e Serbisë. Dokumenti pohon se serbët e Kosovës janë shtetas të Serbisë dhe shpreh shqetësim rreth mundësisë së zëvendësimit të bisedimeve të statusit midis Prishtinës dhe Beogradit, me bisedime për çështje teknike. Sipas deklaratës, çdo zhvendosje e tillë në politikën e Serbisë do të thotë pranim i Planit të Ahtisarit. (Koha.Net, RTK, Kosovapress, Beta, B92, Zeri - 07/09/10)