Gjykata e Mbretërisë së Bashkuar bllokon ekstradimin e Ganiç në Serbi

28/07/2010

LONDER, Mbretëria e Bashkuar -- Një gjykatë në Londër kundërshtoi të martën (27 korrik) kërkesën e ekstradimit të Serbisë lidhur me ish anëtarin e presidencës së Bosnjë dhe Herzegovinës (BiH) Ejup Ganiç. Gjykata vendosi se akuzat ndaj Ganiç mund të kenë qenë politikisht të motivuara. "Këto procedime janë paraqitur dhe përdorur për qëllime politike dhe si të tilla përbëjnë një shpërdorim të procesit të kësaj gjykate," tha Gjyqtari i Qarkut Timothi Uorkmen, duke shtuar se Ganiç është i lirë të kthehet në BiH. Ai u arrestua në Aeroportin Hithrou të Londrës më 1 mars, mbështetur në një urdhër arrestimi të lëshuar nga Beogradi. Serbia e kërkon atë në lidhje me një sulm në maj 1992 kundër një kolone të Ushtrisë Kombëtare Jugosllave që la më shumë se 40 ushtarë të vdekur. Ganiç e përshëndeti vendimin e gjykatës, ndërsa Beogradi u zotua të apelojë. (RTS, Tanjug, B92, Beta, AFP, BBC, The Guardian - 27/07/10)