BE dhe OKB do të bashkërendojnë bisedimet Prishtinë-Beograd

19/07/2010

PRISHTINE, Kosovë -- E përditshmja Express njoftoi të dielën (18 korrik) se shefja e politikës së jashtme të BE Kethrinë Eshton ka rënë dakort me Sekretarin e Përgjithshëm të OKB Ban Ki-mun për të bashkërenduar bisedimet e ardhshëm midis Kosovës dhe Serbisë. Ban kishte propozuar që shefi i UNMIK Lamberto Zanier, i mbështetur nga përfaqësuesi i OKB në Beograd Endrju Gilmur, të bashkërendojnë procesin me BE. Eshton iu përgjigj kërkesës së Ban në një letër, që Express pretendon se ka një kopje. Siguria dhe stabiliteti në rajon është produkt i përpjekjeve të përbashkëta, thotë letra, duke shtuar se suksesi afat-gjatë do të arrihet vetëm nëpërmjet një metodë të përbashkët prej lojtarëve kryesorë ndërkombëtarë në Kosovë. Eshton shkroi se pasi Gjykata Ndërkombëtare e Drejtësisë të njoftojë opinionin e saj të enjten, BE do të dëshirojë që të ndihmojë Beogradin dhe Prishtinën që të vazhdojnë rrugët e tyre për në Europë. Express njofton se këshilltari i Eshton, Robert Kuper, do të drejtojë ekipin e BE për të bashkërenduar punën me përfaqësuesit e OKB. (Express, Kohavision, Telegrafi - 18/07/10)