Vëzhguesit thonë se zgjedhjet e Kosovës përmbushën standardet
17/11/2009
PRISHTINE, Kosovë -- Rrjeti Europian i Organizatave të Mbikqyrjes së Zgjedhjeve (ENEMO) tha të hënën (16 nëntor) se zgjedhjet bashkiake të së dielës përgjithësisht përmbushën standardet ndërkombëtarë me përjashtime të rralla. Misioni, i cili vendosi më shumë se 100 vëzhgues, vuri në dukje disa çështje të tilla si një mungesë udhëzimesh lidhur me dokumentet e pranueshëm të identifikimit. Sipas ENEMO, fshehtësia e votës nuk u respektua kurdoherë dhe persona të pa-autorizuar ishin të pranishëm në 7% të qendrave të votimit të vizituara nga vëzhguesit.
Ndërkohë, përfaqësuesit e institucioneve ndërkombëtarë e lavdëruan procesin zgjedhor. Përfaqësuesi i Posatçëm i BE Pieter Feith uroi popullin e Kosovës për kryerjen e përgjithshme të zgjedhjeve dhe për atmosferën përgjithësisht të dobishme që mbizotëroi. "Kjo e ndihmon Kosovën në tranzicionin e saj drejt një shoqërie shumë-etnike dhe në përpjekjet për të sjellë më shumë qeverisje të efektshme pranë popullit," tha Feith. Ambasadori i SHBA në Kosovë Kristofer Dell lavdëroi gjithashtu procesin dhe uroi serbët e Kosovës që votuan pavarësisht prej thirrjeve nga Beogradi për të bojkotuar. "Ju me të drejtë njohët se zgjedhjet u ofronin një mundësi unike për të formuar të ardhmen tuaj dhe të ardhmen e bashkësive tuaja," tha Dell. (Zeri, Koha Ditore, Lajm, Kosova Sot - 17/11/09; Kohavision, RTK - 16/11/09)