Qiproja do të zhvillojë referendume mbi bashkimin
13/07/2009
NIKOSIA, Qipro -- Bashkësive qipriote greke dhe qipriote turke do t'u kërkohet të miratojnë një marrëveshje ribashkimi në referendume të njëkohshëm dhe më vete, tha të dielën (12 korrik) zëdhënësi i qeverisë Stefanos Stefanu. "Populli i Qipros do të jetë ai që do të vendosë," tha ai. Duke e përshkruar periudhën e tanishme si vendimtare për bisedimet e ribashkimit, ai tha se federata dy-zonale me dy bashkësi është e vetmja rrugë për të "rivendosur integritetin territorial, sovranitetin dhe lirinë" në Qipro.
Të premten, Presidenti qipriot Demetris Kristofias paralajmëroi se gjendja e tanishme në Qipro "përfshin rreziqe të mëdha". Në komentet e cituar nga media vendase ai tha se procesi i ribashkimit në vazhdim do të vazhdojë pasi "nuk ka rrugë tjetër për të arritur një zgjidhje".
Në lajme të tjera, udhëheqësi qipriot turk Mehmet Ali Talat mbërrin në Ankara të hënën për një vizitë pune dy-ditore. Ai do të diskutojë procesin e ribashkimit me Presidentin turk Abdullah Gul, Kryeministrin Rexhep Tajip Erdogan, Ministrin e Jashtëm Ahmet Davidoglu dhe Shefin e Shtabit të Përgjithshëm Ilker Bashbug. (Famagusta Gazette, Philelefteros - 13/07/09; CNA, Anadolu news agency, Zaman - 12/07/09; CNA, Famagusta Gazette, CNNTurk - 10/07/09)