Rumania do të hetojë tetë ministra të qeverisë
26/06/2009
BUKURESHT, Rumani -- Agjensia Kombëtare e Integritetit (ANI) është gati të hetojë tetë ministra lidhur me papërputhshmëritë në deklarimet e tyre të pasurisë, njoftoi të enjten (25 qershor) Presidenti i ANI, Aleksandru Makovei. Të tetë ata janë më të pasurit në qeveri, me pasuri që shkon në 8 milionë euro, tha Makovei. Realitatea TV sugjeroi se Ministri i Ekonomisë Adriean Videanu kryeson listën me pasuri peronale të vlerësuar në 2 milionë euro. Ministri i Transportit Radu Berkeanu është i dyti me 1.87 milionë euro, pasuar nga Ministri i Drejtësisë Katalin Predoiu, me 1.6 milionë euro dhe Ministri i Mbrojtjes Mihai Stanishoara me 250,000 euro. Të gjithë ata janë anëtarë të Partisë Liberale Demokratike.
Anëtarët e qeverisë nga Partia Social Demokratike kanë më pak. Më i pasuri prej tyre është Ministri i Bujqësisë Ilie Sarbu i cili ka deklaruar pasuri prej 208,000 euro. Presidenti Traian Bashesku ka thënë se nuk do të ngurrojë të pezullojë çdo ministër nën hetim për mbushjen e deklarimeve të rreme të pasurive. Kryeministri Emil Bok ka thënë se nuk do të kishte problem në zëvendësimin e Ministres së Rinisë Monika Jakob Ridzi nëse një panel parlamentar gjen se ajo shpërdoroi fondet publike. (Adevarul - 26/06/09; Realitatea - 25/06/09)