Mali i Zi, Maqedonia njohin pavarësinë e Kosovës
10/10/2008
PODGORICË, Mali i Zi -- Si Mali i Zi dhe Maqedonia njohën të enjten (9 tetor) në një masë të bashkërenduar, pavarësinë e Kosovës. Ministri i jashtëm malazes Milan Roçen njoftoi vendimin e qeverisë së tij. "Ky nuk është një vendim kundër Serbisë, po për të ardhmen tonë,' tha ai. Në përgjigje, Serbia përzuri ambasadoren malazeze në Beograd Anka Vojvodiç duke thënë se ajo "nuk është më e mirëpritur në vendin tonë".
Në Shkup, ministri i jashtëm Antonio Milososki njoftoi se qeveria maqedonase njohu gjithashtu pavarësinë e Kosovës. Ligjbërësit me shumicë miratuan një rezolutë të paraqitur nga dy partitë etnike shqiptare, Partia Demokratike e Shqiptarëve dhe Bashkimi Demokratik për Integrimin. Mbështetje vendimtare për rezolutën erdhi nga VMRO-DPMNE qeverisëse. Opozita e Bashkimit Social Demokrat të Maqedonisë, abstenoi. "Kjo është një masë që korrespondon me realitetin. Ne besojmë se ajo nuk do të rrezikojë marrëdhëniet tona me Serbinë," tha Milososki.
Gjithashtu të enjten, Serbia njoftoi se po rivendos ambasadorët në Shtetet e Bashkuara dhe vendet e tjera, përfshirë Japoninë, Kanadanë dhe Australinë, që njohën më parë pavarësinë e Kosovës. Në korrik, Beogradi ktheu ambasadorët e vet në 22 vende të BE që kishin njohur pavarësinë e ish krahinës serbe. (Vjesti, Dnevnik, Vecer, Utrinski Vesnik, Zeri, Koha Ditore, BBC, Express, Kosova Sot - 10/10/08; RTCG, MINA, Makfax, MIA, A1, Tanjug, B92, FoNet, Beta, AFP, Reuters, AP, RTS, VOA - 09/10/08)