Serbia sigurohet se procesi i Kosovës nuk do të lidhet me pranimin në BE

19/10/2007

PARIS, Francë -- BE nuk do t'i lidhë përpjekjet për të zgjidhur statusin përfundimtar të Kosovës me bisedimet e pranimit të Serbisë me BE, i tha ministri i jashtëm francez Bernard Kushner homologut të tij serb Vuk Jeremiç në Paris të enjten (18 tetor). Kushner pranoi, megjithatë, se procesi i pranimit do të jetë më i vështirë në qoftë se statusi i Kosovës nuk zgjidhet. Ai përsëriti mbështetjen e fortë të Francës për hyrjen e Serbisë në BE.

Më vete të enjten, presidenti serb Boris Tadiç tha se vendi i tij nuk do ta këmbente Kosovën për një proces më të shpejtë të mundshëm të pranimit në BE, duke theksuar se procesi i statusit dhe integrimi në BE janë dy çështje të palidhura. Më parë gjatë javës, ministrat e jashtëm të BE shtynë një vendim mbi nënshkrimin e një marrëveshjeje stabilizimi dhe shoqërimi me Serbinë deri në fund të muajit me qëllim që të dëgjojnë një tjetër vlerësim të nivelit të bashkëpunimit të Serbisë me gjykatën e OKB-së për krimet e luftës. (Tanjug, RTS, Beta, Reuters -- 18/10/07)