BE anullon bisedimet midis ministrave turk e qipriot

03/11/2006

BRUKSEL, Belgjikë -- BE ka ndalur planet për një takim midis zyrtarëve evropianë dhe ministrave të jashtëm të Turqisë dhe Qipros. Ministri i jashtëm finlandez Erki Tuomioja, vendi i të cilit mban presidencën e rradhës të BE, tha se rregullimi i takimit dy-ditor qe provuar i pamundur. BE po rrekej të gjente një rrugëdalje nga ngecja lidhur me bisedimet e pranimit të Ankarasë. Turqia ka refuzuar të hapë portet dhe aeroportet e saj ndaj trafikut të Qipros, anëtare e BE, duke kërkuar që BE më parë të heqë kufizimet në tregti me turqit qipriotë.

Qeveria qipriote menjëherë fajësoi Turqinë për anullimin dhe u zotua të vazhdojë të punojë për një zgjidhje. Ministri turk Abdullah Gul nga ana e tij akuzoi grekët qipriotë për abuzimin dhe bllokimin e procesit. Në Athinë, Kryeministri grek Kostas Karamanlis i tha parlamentit se është e papranueshme për një kandidat të BE të refuzojë njohjen e një vendi anëtar të BE. Komisioni Evropian lëshon një raport përparimi mbi Turqinë javën e ardhshme. (Financial Times, Milliyet - 03/11/06; AP, Turkishpress.com, Turkish Daily News, BBC, EU Observer - 02/11/06)