Ivo Sanader
Kryeministër i Kroacisë
(Moljac.hr; SE Times.com) |
Ivo Sanader u emërua Kryeministër pasi Unioni Demokratik Kroat (HDZ) i tij fitoi zgjedhjet e përgjithshme në vend në fund të nëntorit 2003. Sanader e ka renditur integrimin në BE dhe NATO si dy prej përparësive kryesore të tij.
Sanader lindi më 8 qershor, 1953 në Split, Kroaci. Ai përfundoi Universitetin e Insbrukut në Austri, ku studioi Letërsinë e Krahasuar dhe Gjuhët Romake.
Pas kthimit në Kroaci, Sanader punoi në zyrën e marketingut të agjencisë turistike Dalmacijaturist. Më 1998 u bë kryeredaktor i shtëpisë botuese Logos. Në atë kohë, ishte gjithashtu një prej redaktorëve të revistës Mogućnosti (Mundësitë). Më 1991, mori një post drejtues në Teatrin Kombëtar në Split.
Në gusht të vitit 1992, pasi u zgjodh në Dhomën e Përfaqësuesve të Parlamentit kroat, u bë Ministër i Shkencës dhe Teknologjisë, një detyrë të cilën e mbajti deri në janar 1993.
Sanader më pas u emërua Zëvendësministër i Jashtëm. Në këtë detyrë të re, ai mori pjesë në bisedimet dypalëshe të cilat çuan në krijimin e Federatës Kroato-Muslimane të Bosnje-Hercegovinës (FBiH). Ai gjithashtu ndihmoi në diskutimet për heqjen e regjimit të vizave për shtetasit kroatë që udhëtojnë në Greqi. Gjatë kësaj periudhe, Sanader u bë anëtar i Komitetit Qëndror të partisë së tij.
Në fund të nëntorit 1995, pas Marrëveshjeve të Paqes të Dejtonit, Sanader u largua nga qeveria për t'u bërë shefi i kabinetit të Presidentit kroat të atëhershëm, Franjo Tuxhman, i cili e emëroi edhe sekretar të përgjithshëm të Këshillit të Mbrojtjes dhe Sigurisë Kombëtare dhe anëtar të Këshillit Presidencial.
Në janar 1996, Sanader u bë anëtar i Këshillit Shumëpalësh për Bashkëpunimin ndërmjet Kroacisë dhe FBiH-së. Më vonë, u emërua për herë të dytë si Zëvendësministër i Jashtëm.
Më 1998, u zgjodh Kryetar i HDZ-së dhe punoi për të modernizuar dhe forcuar partinë e tij.
"Përparësitë e mia janë rritja e standartit të jetesës në vendin tonë, sigurimi i anëtarësimit në NATO e BE dhe zgjidhja e çështjeve pezull me fqinjët," tha Sanader pas emërimit të tij si Kryeministër nga Presidenti kroat Stipe Mesiç. Ai theksoi se HDZ është ndarë nga e kaluara e saj autoritare dhe është bërë një parti konservative normale.
Sanader është i martuar dhe ka dy vajza.
