Traian Basesku
President i Rumanisë
(Faqja në ueb e bashkisë së qytetit të Bukureshtit, Wikipedia.org, BBC, RFE/RL) |
Traian Basesku, udhëheqësi i Partisë Demokratike (PD) të qendrës, u zgjodh president i Rumanisë më 12 dhjetor 2004, duke mposhtur Kryeministrin Nastase të Partisë Social-Demokratike (PSD) në balotazh. Ai pasoi Jon Ilieskun pasi mandati i dytë rresht i këtij të fundit përfundoi. Në kohën e zgjedhjes, Basesku kishte disa muaj që shërbente në mandatin e tij të dytë si kryetar i bashkisë së Bukureshtit.
Basesku lindi më 4 nëntor 1951 në qytetin e Basarabisë në qarkun e Konstancës. Ai u diplomua në seksionin tregtar të Insitutit Detar me qendër në Konstancë më 1976 dhe më pas shërbeu si kapiten anije për 11 vjet. Më 1987 ai u bë kryetar i Agjencisë Navrom në Antwerp, Belgjikë. Dy vjet më vonë, ai u emërua administrator i përgjithshëm i inspektoratit të lundrimit civil të ministrisë së transportit, duke u bërë më pas nënsekretar i departamentit të tij për transportin detar.
Pas përmbysjes së komunizmit në Rumani, Basesku hyri në politikë, duke u bashkuar me Frontin për Shpëtimin Kombëtar. Pas ndarjes së tij më 1992, ai u bë anëtar i PD-së.
Basesku shërbeu dy herë si ministër i transportit, nga viti 1991 deri më 1992 dhe përsëri nga viti 1996 deri më 2000.
Ai u zgjodh anëtar i parlamentit më 1992 dhe kryesoi Komitetin e Industrisë dhe Shërbimeve të Dhomës së Deputetëve. Ai dha dorëheqjen vullnetarisht më 1996, duke hequr dorë prej imunitetit të tij për të lehtësuar një hetim ndaj tij në lidhje me një marrëveshje privatizimi. Hetimi nuk arriti të gjejë prova që të konfirmonin përfshirjen e supozuar të tij.
Duke konkurruar si kandidat i PD-së, Basesku fitoi mandatin e tij të parë si kryetar i bashkisë së Bukureshtit në balotazh në korrik 2000. Ai u rizgjodh në këtë funksion në qershor 2004, kur mposhti kandidatin e PSD-së, Ministrin e Jashtëm Mircea Geoana, në raundin e parë të votimit.
Basesku u zgjodh kryetar i PD-së më 2001, duke zëvendësuar Petre Roman në krye të partisë. Në shtator 2003, PD dhe Partia Nacional Liberale (PNL) e Teordor Stolojanit formuan aleancën Drejtësi dhe Zhvillim të opozitës.
Stolojan u emërua si kandidat i aleancës për zgjedhjet presidenciale të 28 nëntorit 2004. Në një veprim të habitshëm më pak se dy muaj përpara zgjedhjeve, udhëheqësi i PNL-së njoftoi tërheqjen e tij prej garës, duke përmendur shëndetin e dobët. Basesku atëherë u bë kandidati i ri i aleancës.
Nastase pati një kryesim me 7 përqind në raundin e parë të zgjedhjeve, por u mposht nga Basesku në balotazh. Presidenti i ri tha se lufta kundër korrupsionit do të jetë një prej përparësive kryesore të tij, së bashku me drejtimin e Rumanisë në BE.
Ai është i martuar dhe ka dy vajza.
