Biznes: Pepsi blen kompaninë e ujit mineral serb

08/08/2008

Serbia po negocion shitjen e Knjaz Milos, prodhuesin e saj më të madh të ujit mineral. Po ashtu këtë javë: një fabrikues francez i makinave do të hapi një fabrikë në Bullgari dhe Standard & Poor mbështet perspektivën e Rumanisë.

[Getty Images]

Pepsi konfirmoi se po negocion blerjen e prodhuesit më të madh Serb të ujit mineral, Knjaz Milos. Drejtori i përgjithshëm i firmës serbe, Rade Pribicevic, tha se shitja është gati të përfundojë në fund të vitit, me një çmim që pritet të jetë më i lartë se 200 milion euro.

***

Fabrikuesi francez i pjesëve të makinave Montupet lajmëroi se fabrika e tij në Ruse, Bullgari, do të fillojë të funksionojë në 12 shtator. Fabrika prej 36 milion euro do të furnizojë pjesë për Renault, Peugeot, Citroen, Audi dhe Ford.

***

Standard & Poor's rriti vlerësimin e riskut të investimeve në Rumani nga Grupi 8 në 7 dhe uli vlerësimin e rënies ekonomike nga 35-50% në 25-40%. Klasifikimi i ri reflekton rritjen dhe përmirësimet teknologjike në sektorin bankar.

***

Izmiri, Turqi, do të organizojë Panairin e 77 Ndërkombëtar, duke mbledhur mbi 1,100 kompani nga 60 vende midis 22 dhe 31 gushtit. Kompanitë do të krijojnë ekspozime për 19 grupe produktesh të ndryshme, tha kryetari i bashkisë së Izmirit, Aziz Kocaoglu. Vendi i ftuar i nderit i këtij vitit është Kuba.

***

Shqipëria dha 37% më shumë fonde për buxhetin e këtij viti krahasuar me gjysmën e parë të 2007, tha të hënën (4 gusht) ministri i financës Ridvan Bode. Shpenzimet e planifikuara të buxhetit janë realizuar në masën 87%, ndërsa suplementari arrin në 41 milion euro.

***

Agjencitë e Kosovës harxhuan vetëm 30% të buxheteve të tyre në gjysmën e parë të këtij viti, tha në një njoftim ministria e financave. Vetëm 14% e buxhetit të planifikuar për investimet kapitale është harxhuar.

***

Këshilli i Konkurrencës të Kroacisë ka vendosur të ngrijë mbështetjen financiare të qeverisë për ristrukturimin e fabrikave vendase të ndërtimit të anijeve. Këshilli theksoi se qeveria vendosi të privatizojë fabrikat 3.Maj, Brodosplit, Brodotrogir, Kraljevica dhe Uljanik dhe se këto privatizime duhet të përfundojnë para ndonjë restrukturimi tjetër.

***

Mali i Zi fitoi 24.5 milion euro në gjysmën e parë të vitit nga privatizimi, shitja e aksioneve dhe pronave të patundshme, lajmëroi të premten (1 gusht) Këshilli i Privatizimit në vend. Këshilli vendosi në një seancë të ndërmerrte hapa për privatizimin e Budvanska Rivjera, Ulcinjska Riviera, Instituti i Metalurgjisë së Zezë dhe ndërmarrje të tjera.

(Burime të ndryshme – 01/08/08 - 08/08/08)