Kulturë dhe sporte: Shqipëria feston Ditën e Evropës

14/05/2008

Bashkë me autoritetet e tjera në rajon, Shqipëria festoi Ditën e Evropës në 9 maj. Gjithashtu në lajmet: Novak Gjokoviç i Serbisë fiton finalen e Mjeshtrave të Romës dhe Shqipëria pret garën e parë të Motor Rally.

Presidenti shqiptar Bamir Topi (në mes) përgatitet të ngasë biçikletën me fëmijët në bulevardin kryesor të Tiranës, të shtunën (10 maj) për të përkujtuar Ditën e Evropës. Shumë banorë u hipën biçikletave në vend të makinave për të përkrahur temën "Në Evropë pa smog". [Getty Images]

Kandidatja për në BE, Shqipëria, së bashku me vendet e tjera në rajon festoi të premten (9 maj) Ditën e Evropës. Po atë ditë, në 1950, Robert Shuman, paraqiti propozimin e tij për një Evropë të organizuar. Plani i tij i njohur si "Deklarata Shuman" më pas mori mirënjohje si fillimi i BE të sotme.

***

Ylli i tenisit serb Novak Gjokoviç fitoi të dielën (11 maj) finalen e Mjeshtrave të Romës duke mundur të paklasifikuarin Stanislav Vavrinka të Zvicrës, 4-6, 6-3, 6-3. Më parë këtë sezon, Gjokoviç fitoi Grand Slamin e tij të parë në Australi dhe doli gjithashtu i pari në Indian Wells Masters.

***

Qyteti i Vlorës në Shqipëri priti të dielën (11 maj) garën e parë të Motor Rally në vend. Veprimtarinë e ndoqën 62 pjesëmarrës nga Shqipëria, rajoni dhe Evropa. Çmimin e parë e morën motoçiklistët nga Kosova.

***

Këngëtari i vdekur maqedonas Tose Proeski fitoi pas vdekjes Këngën e Vitit në festivalin Porin në Kroaci. Proeski, që vdiq në një aksident makine në Kroaci vjeshtën e kaluar, fitoi për këngën e tij "Lojra pa kufi". Albumi i tij me të njëjtin emër ishte më i shituri në Kroaci në 2007.

***

Rreth 20,000 vetë morën pjesë në maratonën e 25-të të këtij viti të Athinës, të dielën (11 maj). Gara e vrapimit është veprimtaria më e madhe sportive dhe kulturore e organizuar nga autoritetet e bashkisë së Athinës. Veprimtaria e këtij viti përkoi me Ditën e Nënës.

***

Rumania priti një festival të fëmijëve rumunë që jetojnë jashtë, të shtunën (10 maj), i pari i këtij lloji. Veprimtaria "Bari i gjelbërt i shtëpisë" organizuar nga Pallati i Fëmijëve i Bukureshtit, mblodhi më tepër se 200 fëmijë që jetojnë jashtë. Qëllimi ishte të lehtësojë aksesin e tyre ndaj kulturës rumune.

***

Qyteti i Rijekës, Kroaci, priti turneun e tenisit Sfiduesi të hënën (12 maj). Nikolas Masu i Kilit, kampioni olimpik në Athinë 2004, mundi në finale Kristof Roçus të Belgjikës.

(Burime të ndryshme – 07/05/08-14/05/08)