Kulturë dhe sporte: Regjizorët e BiH të filmit kërkojnë arrestimin e Karaxhiç

26/12/2007

Çuarja e të arratisurit për krime lufte Radovan Karaxhiç para drejtësisë do të ndihmojë pastrimin e rrugës së Bosnje dhe Herzegovinës drejt pranimit në BE dhe NATO, thanë në një thirrje të përbashkët një grup regjizorësh dhe artistësh. Gjithashtu këtë javë: këngëtari i vdekur maqedonas Tose Proeski cilësohet si njeriu i vitit i Kroacisë.

Një grup filmabërësish të BiH duan të kapet Radovan Karaxhiç. [Getty Images]

Një grup regjizorësh dhe artistësh të njohur nga Bosnje dhe Herzegovina lëshuan një thirrje të përbashkët ku kërkohet arrestimi i ish kreut serb boshnjak Radovan Karaxhiç, i cili është në arrati që nga padia e gjykatës së OKB-së për krimet e luftës në Hagë, 12 vjet më parë. Nënshkruesit përfshijnë Danis Tanoviç, filmi i të cilit "Toka e askujt" fitoi një Oskar për filmin më të mirë të huaj në 2001 dhe Jasmila Zbaniç, e cila fitoi Ariun e Artë të Berlinit vitin e kaluar për filmin e saj "Grbavica"

***

Shkrimtarit turk me famë botërore Orhan Pamuk ju dha një doktoraturë nderi nga Universiteti Complutense i Madridit. Në fjalimin e tij të marrjes së çmimit, laureati i çmimit Nobel bëri thirrje për bashkimin e qytetërimeve, duke thënë se përpjekjet duhet të bëhen jo vetëm në nivelin politik por nëpërmjet të gjitha segmenteve të shoqërisë.

***

Patriarkati në Rumani mbajti anën e ambasadës iraniane në Bukuresht të premten (21 dhjetor) duke denoncuar romanin e Salman Ruzhdi "Vargjet satanike" i cili u përkthye së fundmi në rumanisht. Përkthimi doli në libraritë e Bukureshtit në 19 dhjetor në një edicion të kufizuar dhe u shit brenda disa orësh. Irani i kërkoi autoriteteve rumune ta ndalojnë librin. Duke shprehur "solidaritet me komunitetin musliman në Rumani", patriarkati po e dënon gjthashtu atë.

***

Këngëtari maqedonas Tose Proeski, i cili vdiq në një aksident me makinë në 16 tetor në Kroaci, është votuar si Njeriu i Vitit në këtë vend. Ai fitoi 48% të votave midis lexuesve të uebsajtit kroat të internetit Dnevnik.hr. Pjesëmarrësve u duhej të zgjidhnin ndërmjet nëntë kandidatëve për titullin.

***

Mundësja femër Stanka Zlateva u cilësua si sportistja numër një e Bullgarisë në një ceremoni të premten (21 dhjetor). Ajo fitoi nderimin e lartë për shkak të titujve të saj botërorë dhe evropianë. Çmimi vjetor shënoi 50 vjetorin e tij këtë vit.

***

UEFA cilësoi fituesin e Këpucës së Artë Davor Suker si futbollistin më të mirë të Kroacisë në 50 vitet e fundit. Suker shënoi gjashtë gola në kampionatin botëror të futbollit në Francë në 1998 ku Kroacia mori medaljen e bronxit.

(Burime të ndryshme -- 19/12/07-26/12/07)