Shkencë dhe teknologji: do të vazhdojnë gërmimet në Anatolia.

12/11/2007

Gjetje të rëndësishme janë zbuluar në një vend në krahinën Bitlis. Gjithashtu këtë javë: një raport i ri thotë se gati 80% e softuereve në tregun serb janë të paligjshme.

Gjetje të rëndësishme arkeologjike u zbuluan këtë vit në krahinën lindore të Anatolisë, Bitlis. [AFP]

Një grup arkeologësh turq do të vazhdojë gërmimet në krahinën anatoliane Bitlis, tha të martën (6 nëntor) kreu i ekipit Kadir Pektash. Këtë vit atje janë gërmuar gjetje të rëndësishme duke përfshirë një numër monedhash, pjesë qeramike dhe rrathë zbukurimi.

***

Një raport i Business Software Alliance (BSA) të martën (6 nëntor) tha se 78% e të gjithë softuerëve në tregun serb janë të paligjshme. Sipas BSA, një shoqatë që lufton piraterinë kompjuterike, Serbia ka normën më të lartë të piraterisë në Evropën Qendrore e Lindore. Vetëm 41.8% e shpërndarësve të kompjuterave ofrojnë softuere origjinale, ndërsa 57% nuk informojnë blerësit për gjobat e mundshme ligjore.

***

Panairi i dhjetë ndërkombëtar i ushqimit organik, Eco Festival 2007 u zhvillua në Athinë, nga e enjtja (8 nëntor) deri të dielën. Morën pjesë më tepër se 170 organizata dhe kompani mjedisore, duke përfshirë firma që punojnë në burimet e energjisë së ripërtëritshme.

***

Një projekt ekologjik mbi mbledhjen e mbeturinave plastike u bë të enjten (8 nëntor) në Gostivar, Maqedoni. Projekti u zbatua me mbështetjen e USAID dhe kishte për qëllim rritjen e ndërgjegjësimit të rëndësisë së riciklimit të mbetjeve plastike.

***

Akademia e Shkencave dhe Arteve e Maqedonisë kremtoi 40 vjetorin e saj të enjten (8 nëntor). Veprimtaritë jubilare përfshinë 200 takime shkencore dhe projekte bashkëpunimi të ndërsjelltë me më tepër se 25 akademi kombëtare.

***

Microsoft Bosnje dhe Herzegovina (BiH) njoftoi të enjten (8 nëntor) hapjen e një qendre të re në vend me mbështetje teknike më efektive e më të shpejtë të klientëve në të tre gjuhët e BiH. Microsoft BiH gjithashtu njoftoi se versioni lokal i prodhimeve të tij të fundit, Windows Vista dhe Office 2007, do të qenë në dispozicion deri nga fundi i vitit.

***

Ekspozita e 32-të vjetore e novacioneve, Inova, u hap të mërkurën (7 nëntor) në Zagreb. Veprimtaria ka paraqitur novacionet më të suksesshme kroate që nga viti 1971. Ekspozita do të shoqërohet nga një panair i multimedias i titulluar "Lavdëruar me vështrim të parë".

(Burime të ndryshme – 05/11/07-12/11/07)