Ditari diplomatik: Kroacia dhe Serbia inagurojnë pikën kufitare

25/07/2006

Kryeministri kroat Ivo Sanader dhe Kryeministri serb Vojislav Koshtunica inaguruan një pikë kufitare të premten. Gjithashtu në diplomaci: Presidenti i KE Zhose Manuel Barozo takohet me Presidentin serb Boris Tadiç dhe Erhard Busek i Paktit të Stabilitetit viziton BH.

Kryeministri serb Vojislav Koshtunica (në të djathtë) dhe homologu kroat Ivo Sanader japin duart njëri-tjetrit të premten (21 korrik) në pikën kufitare të rinovuar Batrovçi-Bajakovo midis Serbisë dhe Kroacisë.

Kryeministri Kroat Ivo Sanader ishte të premten (21 korrik) në Beograd për takime me Kryeministrin serb Vojislav Koshtunica dhe Presidentin serb Boris Tadiç. Ai deklaroi se bashkëpunimi dypalësh është rritur veçanërisht këto vitet e fundit, dhe shprehu besimin se plani i veprimit të Serbisë për bashkëpunimin me gjykatën e krimeve të luftës të OKB-së do të sjellë rezultate. Sanader dhe Koshtunica hapën gjithashtu pikën kufitare të modernizuar në Batrovçi-Bajakovo, e cila është bashkëfinancuar nga BE.

***

Ministrja e Brendshme Kroate Ivica Racan dhe homologu i saj, Dragutin Mate, u takuan të martën (18 korrik) në Rovinj, për të diskutuar bashkëpunimin dypalësh lidhur me sezonin turistik veror. Bisedimet u fokusuan mbi aktivitetet konkrete në kufijtë e përbashkët, po ashtu dhe në rritjen e sigurisë në vendpushimet në të dyja vendet.

***

Presidenti i Komisionit Evropian Jose Manuel Barozo dhe Presidenti Serb Boris Tadiç u takuan të martën (18 korrik) në Bruksel. Barozo deklaroi se Marrëveshja e Stabilizim Asociimit midis Serbisë dhe BE-së mund të vuloset në fund të vitit në se Beogradi zbaton planin e tij të veprimit me rezultate të kënaqshme.

***

Koordinatori Special për Paktin e Stabilitetit për Evropën Juglindore Erhard Busek u takua me Zëvendësin e Parë të Përfaqësuesit të Lartë Lari Butler dhe Kryeministrin e BH-së Adnan Terziç të enjten (19 korrik) në Sarajevë.

***

Kryeministri Kosovar Agim Çeku mbërriti të mërkurën (19 korrik) për një vizitë zyrtare në Slloveni. Ai u takua të enjten me homologun Janez Jansa, Ministrin e Jashtëm Dimitrij Rupel, Presidentin Janez Drnovsek dhe Kryetarin e Parlamentit France Cukjati.

(Burime të ndryshme – 18/07/06-25/07/06)