Maqedonia do reagim më të fortë në çështjen e MAT me Greqinë

06/05/2008

SHKUP, Maqedoni -- Qeveria pret një reagim më të fortë nga Komisioni Evropian (KE), Organizata Ndërkombëtare e Aviacionit Civil dhe struktura të tjera kompetente që janë informuar rreth ndalimit nga Greqia të fluturuesit maqedonas MAT, tha të hënën (5 maj) zëdhënësi i qeverisë Ivica Boçevski. Ai shprehu shpresë se Greqia do të heqë dorë nga politika e vet mbi çështjen dhe tha se kjo nuk kontribuon për marrëdhënie të mira fqinjësore.

"Maqedonia ka qenë kurdoherë një fqinjë e mirë dhe një anëtare aktive e konstruktive e komunitetit ndërkombëtar. Ne presim të trajtohemi në po këtë mënyrë nga tamam ato vende që i takojnë familjes së lidhur me vlerat perëndimore të lirisë, demokracisë dhe një ekonomie të lirë tregu," tha Boçevski. KE ka shprehur shqetësim rreth politikës duke thënë se ajo mund të bjerë në kundërshtim me marrëveshjen midis BE dhe vendeve të Ballkanit Perëndimor. (Vreme, Utrinski Vesnik - 06/05/08; MIA, Netpress - 05/05/08)