Bashkëpunimi është kyç në një politikë të përdorimit të përbashkët të energjisë

04/07/2012

Puna e përbashkët mbi çështjet e energjisë anembanë Evropës Juglindore bëhet më popullore gjatë Javës së Energjisë së Pandërprerë të BE.

Nga Ivana Jovanoviç për Southeast European Times në Beograd --04/07/12

Ndarja e një politike rajonale të energjisë është vendimtare për të lehtësuar procesin e integrimit të energjisë. [Nada Bozhiç/SETimes]

Tregu i përgjithshëm i elektricitetit i Evropës Juglindore është relativisht i vogël, krahasuar me tregjet e shteteve individuale, duke inkurajuar një përpjekje rajonale në tërheqjen e investitorëve të infrastrukturës.

Sipas Nina Gradall-Edler, kreu i Bordit Regullator të Energjisë së Komunitetit në Vienë, ndarja e një politike të energjisë është vendimtare për të përmbushur sfidat aktuale dhe për të lehtësuar procesin e integrimit të energjisë.

"Institucionet tona operojnë në nivelin ministror dhe rregullator si platforma bashkërenduese për të bërë të efektshme veprimtaritë përtej kufijve dhe për zhvillimin e një rruge të harmonizuar përpara. Legjislacioni është megjithatë, vetëm hapi i parë. Zbatimi i rregullave, në praktikë, teksti dhe fryma janë shtytësit për suksesin e liberalizimit," i tha SETimes Gradall-Edler.

Disa palë kontraktuese të legjislacionit të energjisë janë në përputhje më të mirë me legjislacionin e rënë dakord se sa të tjera dhe kjo është një nga çështjet kryesore në procesin e integrimit të tregut të Ballkanit.

"Diferencat midis palëve kontraktuese zgjerohen, një zhvillim që nuk kontribuon pozitivisht në një objektiv tregu rajonal," shtoi Gradall-Edler.

Disa palë kontraktuese përmbushën legjislacionin e kërkuar në 2011 dhe reformat e arritura në Maqedoni, Malin e Zi dhe Serbi janë gjithashtu shembuj të mirë, ndërsa Shqipëria dhe Molldavia po diskutojnë reformat për të qëndruar me ndryshimet e tregut rajonal.

Integrimi i Malit të Zi në tregun rajonal të elektricitetit varet në dy projekte: i pari, ndërlidhësi nëndetar Mali i Zi - Itali dhe i dyti është Zyra e Ankandit të Bashkërenduar për shpërndarjen e kapacitetit të ndërlidhjes në rajon.

"Projekti i parë do të lidhte Italinë dhe SEE, duke shkaktuar kushte të favorshme për investimet e huaja, me mundësitë për eksportin e energjisë shtesë dhe rritjen e sigurisë, efektshmërinë e furnizimit të sistemit të energjisë, sigurinë e sistemit të transmetimit në Malin e Zi dhe sistemet rajonale të energjisë," i tha SETimes Aleksandar Mijushkoviç, drejtor i departamentit të Sistemit të Transmetimit Elektrik të Malit të Zi.

Artikuj që kanë lidhje

Grall-Edler tha se rajoni mund të përfitojë nga pozicioni i tij strategjik gjeografik. "Diskutimet e Korridorit Jugor mund të nxisin pozitivisht investimet e infrastrukturës së gazit në rajon. Në sektorin e elektricitetit, aksionmbajtësit po punojnë aktivisht mbi ngritjen e një tregu rajonal të shitjes me shumicë për të rritur likuiditetin dhe tregtimin."

Mungesa e përfundimit serioz në fazë të çmimeve të energjisë së rregulluar, parandalimit të rrjedhjes së elektricitetit ndaj përdoruesve individualë dhe ndërgjegjësimi përgjithësisht i varfër i rëndësisë së elektricitetit janë sfida të mbarë rajonit.

Grupe të shumta pune, megjithatë janë përqëndruar në çështje të ndryshme të energjisë rajonale.

"Serbia është një pjesë e këtyre grupeve dhe si anëtare e tyre po përpiqet të kontribuojë në bashkëpunimin më të mirë rajonal, nëpërmjet përpjekjeve të përbashkëta për të zgjidhur çështje si kapaciteti i pamjaftueshëm për zbatimin e masave, zbatimi i ngadaltë i rregulloreve [dhe] mungesa e nxitjeve," i tha SETimes Bojan Kovaçiç, nëndrejtor në Agjensinë serbe të Efektshmërisë së Energjisë.

Kjo përmbajtje është autorizuar nga SETimes.com.