Ushtritë e Ballkanit do të formojnë forcën e posatçme të përbashkët mjekësore

26/06/2012

Gjatë takimit në Beograd këtë muaj, personeli mjekësor nga ushtri të ndryshme u mblodh dhe ra dakort që të luftojë bashkërisht pasojat e fatkeqësive natyrore.

Nga Ivana Jovanoviç për Southeast European Times në Beograd -- 26/06/12

Telemjekësia do të lejojë specialistë mjekësorë nga ushtri të ndryshme që të kontribuojnë në rastet. [Reuters]

Kongresi vjetor i këtij viti i Komitetit të Mjekësisë Ushtarake të Ballkanit (BMMC) këtë muaj përfundoi me një marrëveshje për të ngritur një Forcë të Posatçme të Përbashkët Mjekësore të Ballkanit.

Kryetari i kongresit, Koloneli Zoran Popoviç i Serbisë shpjegoi se forca do të aktivizohet në rast të fatkeqësive masive. Faza 1 pritet të zhvillohet deri më 2015, me forcën e posatçme plotësisht funksionale deri më 2017.

Presidenti i Komitetit, Koloneli Gjoko Maksiç, gjithashtu nga Serbia, tha për SETimes se projekti do të krijojë ekipe të përbashkëta mjekësore "për të vepruar në gjendje të emergjencës, fatkeqësi natyrore e të tjera."

Dy marrëveshje të tjera të arritura gjatë kongresit përfshijnë "shkëmbimin e ekspertëve [e] mundësinë e ndërveprueshmërisë më të mirë të shërbimeve mjekësore ushtarake nëpërmjet telemjekësisë," vuri në dukje Popoviçi.

Ai e përshkroi telemjekësinë si një novacion mes vendeve në rajon që do të përmirësojë njohuritë e cilësinë e trajtimit. Ajo do të bëjë të mundur që mjekët të shkëmbejnë imazhe e procedura diagnostikimi në një kohë shumë të shkurtër kohe e të marrin opinionin e kolegëve nga i gjithë Ballkani.

"Jam i sigurtë se shkëmbimi i mjekëve e teknikëve mjekësorë, në varësi të programeve të trainimit të ofruara nga shërbimet ushtarake në rajon, do të jenë veprimtari shumë intensive pasi të gjithëve na janë ofruar programe arsimore e të gjitha janë të cilësisë së lartë. Një segment i veçantë e shumë i rëndësishëm i bashkëpunimit në këtë fushë është shkëmbimi i kadetëve [nga] Universiteti Mjekësor Ushtarak," tha ai.

Në tërësi, 200 ekspertë mjekësorë nga ushtritë e vendeve anëtare -- Turqia, Greqia, Bullgaria, Rumania e Serbia -- ndoqën këtë konferencë të 17-të. Shqipëria mungonte, duke përmendur vështirësitë financiare. Mali i Zi ishte atje, megjithatë, me statusin e vëzhguesit.

Qëllimi këtë vit, si çdo vit, ishte të shkëmbehet njohuri e përvojë, duke veçuar idetë më të mira për të përmirësuar sigurinë e përgjithshme të rajonit.

Artikuj që kanë lidhje

Një nga themeluesit e komitetit, Koloneli bullgar Evgenij Belokonski Iliev, tha se përfitimet e këtyre projekteve të përbashkëta shkojnë përtej fushës së mjekësisë ushtarake e në marrëdhëniet e përgjithshme mes vendeve.

"Miqësia e mbështetja e ndërsjelltë janë përfitimet më të mëdha ... sepse miqtë do të ndihmojnë kurdoherë më mirë e më shpejt se të tjerët," tha për SETimes Belokonski Iliev.

Pritësja e këtij viti, Serbia, është i vetmi vend jo-anëtar i NATO-s. Ajo është në rrugën e anëtarësimit, megjithatë, duke marë pjesë në programin e Partneritetit për Paqe.

Aleanca përfaqësohej në kongres nga Gjenerali Rob van der Mer i Hollandës. "Kjo konferencë kontribuon në bashkëpunimin rajonal në mjekësinë ushtarake, si lidhur me shkencën e shkëmbimin e informacionit, ashtu edhe në bashkëpunimin operacional," tha ai për SETimes.

Kjo përmbajtje është autorizuar nga SETimes.com.