Zgjedhja e Jeremiçit përmirëson imazhin botëror të Serbisë

14/06/2012

Ministri i Jashtëm i Serbisë Vuk Jeremiç u zgjodh president i sesionit të ardhshëm të Asamblesë së Përgjithshme të OKB-së. Analistët besojnë se zgjedhja konfirmon se Beogradi ka rehabilituar imazhin e tij në botë.

Nga Igor Jovanoviç për Southeast European Times në Beograd -- 14/06/12

Vuk Jeremiç do të drejtojë Asamblenë e Përgjithshme të OKB-së për një vit, duke filluar më 18 shtator. [Reuters]

Më pak se dy dekada pas konfliktit që çoi në fushatën e bombardimeve të NATO-s në Serbi e një padie të shumë prej udhëheqjes së vendit për krime lufte, një politikan serb do të bëhet president i Asamblesë së Përgjithshme të OKB-së.

Analistët thonë se fitorja e Ministrit të Jashtëm Vuk Jeremiç 99 me 85 më 8 qershor ndaj Ambasadorit lituanez Dalius Cekuolis është një shenjë e qartë se Serbia e ka rregulluar ndjeshëm pozicionin ndërkombëtar të saj. Jeremiçi e përshkroi votimin si "një referendum për Serbinë."

"Zgjedhja e Jeremiçit, pavarësisht nga njoftimi i kandidaturës së tij relativisht vonë në krahasim me kundërshtarin lituanez të tij, tregon fuqinë e qëndrimit të Serbisë brenda OKB-së, në veçanti mbështetjen e marë nga lëvizja e shteteve që nuk bëjnë pjesë në blloqet e fuqive kryesore," tha për SETimes Jan Bankroft, drejtor ekzekutiv i grupit të studimeve TransConflict.

"E kombinuar me kryesimin e ardhshëm të Serbisë në OSBE, i ofron Serbisë një mundësi të rëndësishme për të rehabilituar më tej reputacionin e saj në skenën botërore," tha ai.

Funksioni një vjeçar i Jeremiçit në OKB do të fillojë më 18 shtator.

Borisllav Stefanoviç, drejtor politik prej kohësh në ministrisë së jashtme të Serbisë, e përshkroi zgjedhjen e Jeremiçit si një "lajm të shkëlqyer" për Serbinë. "Ka të bëjë me reputacionin e prestigjin diplomatik të një vendi që të mbajë kryesinë e Asamblesë së Përgjithshme të OKB-së e ajo konfirmon reputacionin e mirë të Serbisë," tha ai për SETimes.

Predrag Simiç, profesor pranë Fakultetit të Shkencave Politike të Beogradit, tha për SETimes se zgjedhja e Jeremiçit do të ndihmojë në rritjen e besueshmërisë ndërkombëtare të Serbisë.

"Serbia tani ka shumë më tepër peshë në marrëdhëniet ndërkombëtare e do të përfshihet në të gjitha ngjarjet botërore përmes Jeremiçit," tha Simiçi.

Ai shtoi se ndërsa Serbia nuk do të ketë ndikim të drejtpërdrejtë në zhvillimet në Kosovë ose në pozicionin e serbëve atje, do të jetë në gjendje të ndikojë mbi çështjet në mënyrë të tërthortë.

Ardian Arifaj, drejtor i programit pranë Institutit Kosovar për Kërkim e Zhvillim, tha se zgjedhja e Jeremiçit ishte një mjet për të arritur diçka tjetër.

"Mes faktorëve kryesorë që [çuan në] zgjedhjen e Jeremiçit është dëshira e BE-së dhe e SHBA-së për t'a larguar [atë] nga politika e jashtme serbe, duke qenë se [pjesëmarrja e tij] nuk ka qenë bashkëpunuese ose e dobishme, veçanërisht për Kosovën," tha Arifaj për SETimes.

Artikuj që kanë lidhje

Ai tha se Jeremiçi mund të ndërlikojë marrëdhëniet me OKB, por jo fushatën për njohjen e Kosovës, për të cilën Jeremiçi ka qenë një pengesë kryesore.

Jo të gjithë në Serbi janë të kënaqur me zgjedhjen e Jeremiçit.

Bojan Gjuriç, një zyrtar në Partinë Liberal Demokrate, thotë se rëndësia e vërtetë politike e funksionit të kryetarit të Asamblesë së Përgjithshme të OKB-së "është padyshim shumë më e vogël sesa kostoja e vlera e të gjitha burimeve shtetërore që ka shpenzuar Jeremiçi gjatë fushatës së tij në mbarë botën."

Korrespondenti i SETimes Muhamet Brajshori në Prishtinë kontribuoi për këtë raport.

Kjo përmbajtje është autorizuar nga SETimes.com.