Bullgaria e Serbia rrisin bashkëpunimin ushtarak

23/03/2012

Lidhjet në rritje të mbrojtjes përkrahin gjithashtu aspiratat e integrimit të Beogradit.

Nga Ivana Jovanoviç për Southeast European Times në Beograd -- 23/03/12

Një ushtar serb trainohet me trupa bullgare gjatë një stërvitje të përbashkët. [Ambasada bullgare në Beograd]

Më parë këtë muaj në Beograd, përfaqësuesit e Bullgarisë e Serbisë nënshkruan planin e tyre vjetor për bashkëpunimin ushtarak dypalësh. Dokumenti tërësor mbulon aspekte lidhur me mbrojtjen të shëndetësisë, arsimit, policisë e gjeografisë, si dhe pjesë të re mbi pushimet e ushtrisë, duke përfshirë vizita familjare, turistike të oficerëve ushtarakë serbë në Bullgari e anasjelltas.

Bashkëpunimi ushtarak mes Bullgarisë e Serbisë daton që më 1996, kur u nënshkrua marrëveshja kuadër e bashkëpunimit ushtarak, e cila u rinënshkrua më 2007 pasi Serbia e Mali i Zi u ndanë. Ky bashkëpunim ka qenë shënuar nga rritja e vazhdueshme që atëhere.

Sipas atasheut të mbrojtjes të Bullgarisë në Beograd, Kolonen Lejtnant Emil Sipocki, plani i bashkëpunimit për vitin e kaluar u zgjerua me më shumë se 130% dhe e njëjta gjë pritet këtë vit.

Tashmë këtë vit, fqinjët kanë bashkëpunuar në pothuajse 30 veprimtari ushtarake.

Branisllav Xhorxheviç, drejtor i Qendrës për Studime Strategjike në Akademinë për Diplomaci e Sigurim të Beogradit, tha për SETimes se bashkëpunimi i mbrojtjes me vendet fqinjë është i pashmangshëm, duke ditur pozicionin gjeopolitik, kërcënimet e sfidat e njëjta ose të ngjashme.

"Marrëdhënia mes Serbisë e Bullgarisë në fushën e mbrojtjes është provë e asaj sesi mund të kapërcehet trashëgimia historike negative. [Një tjetër] shembull i mirë i kësaj marrëdhënie është në lidhje me Gjermaninë e Francën," tha Xhorxheviçi.

Ai tha se përfitimi më i madh i këtij bashkëpunimi është fakti se Bullgaria është një anëtare e NATO-s dhe se Serbia, si një anëtare e Programit të Partneritetit për Paqe, është e detyruar të marë pjesë në veprimtaritë e saj, duke fituar kështu përvojë të konsiderueshme.

Bashkëpunimi dypalësh, nga ana e tij, bëhet shumëpalësh. Për shembull, ushtria bullgare ftoi atë të Serbisë që të marë pjesë në stërvitjet e përbashkëta me trupa bullgare e të SHBA-së në projektin Forca me Turne e Detit të Zi e EUCOM-it, që u zhvillua në Bullgari.

Gjithashtu, gjatë kryesimit të Bullgarisë në Procesin Ministror të Mbrojtjes të Evropës Juglindore, Serbia u bë një anëtare e plotë.

Vitin e kaluar, Bullgaria i dhuroi Serbisë programe kompjuterikë për kodifikimin në sistemin mbrojtës, duke çuar në respektimin e standarteve të NATO-s dhe BE-së.

Artikuj që kanë lidhje

"Shpresojmë se kemi kontribuar në arritjen e standarteve më të larta nga Serbia, që përfshin përmbushjen e kushteve për hyrjen e shpejtë të Serbisë në Agjenscinë e Mbrojtjes Evropiane," tha Sipocki për SETimes.

Stërvitja më e rëndësishme ushtarake që përfshin dy forcat ajrore është qitja reale në strukturën e trainimit Sabla në Bullgari. Sabla u vizitua nga udhëheqësit shtetërore e ushtarakë të të dyja vendeve.

Zanko Spasov, 62 vjeç, një shtetas bullgar që jeton në Nish, tha se marrëdhëniet ushtarake të mira mes fqinjëve rrisin nivelin e qetësisë.

"Kur e di se populli yt bashkëpunon me vendin ku jeton, ke më shumë siguri; ndjehesh i mbrojtur. Jam me të vërtetë i inkurajuar me këtë plan vjetor sepse jam i sigurtë se nuk do të ketë një luftë," tha Spasovi për SETimes.

Kjo përmbajtje është autorizuar nga SETimes.com.