Bullgaria ngrin miliona në financime të BE-së

15/09/2011

Në një veprim të pashembullt, Bullgaria ka ngrirë 30 milionë euro në ndihmë të BE-së për projekte të zhvillimit rajonal dhe mjedisor në qytetin Sliven, thanë zyrtarët të mërkurën.

(Sega, Trud, FOCUS News Agency - 15/09/11; AFP, The Sofia Echo, Sofia News Agency, BNT, Capital.bg, Dnevnik.bg, Mediapool - 14/09/11)

Zyrtarë bullgarë pezulluan 30 milionë euro në ndihma të BE-së për qytetin Sliven për shkak të një mashtrimi të mundshëm. [Reuters]

Kryeministri bullgar Bojko Borisov pohoi të mërkurën (14 shtator) se tetë projekte të financuara nga BE-ja në qytetin juglindor të Slivenit në vendin e tij janë pezulluar nga qeveria për shkak të dyshimeve për mashtrim.

Financimi për zbatimin e tyre, që arrin në rreth 30 milionë euro, do të mbetet i bllokuar derisa "e gjithë situata ... të jetë sqaruar," shtoi ai, duke theksuar se personalisht kishte urdhëruar ngrirjen e ndihmës.

Borisovi tha se vendosi të ndërmarrë veprimin e pashembullt për vendin e tij pasi katër ose pesë anëtarë të qeverisë së tij e kishin njoftuar gjatë muajit të kaluar apo rreth asaj kohe për shqetësimet e tyre në lidhje me probleme me projektet në Sliven, që drejtohet nga kryetari i bashkisë Jordan Leçkov.

Mes tyre ishin ministrja e zhvillimit rajonal Liljana Popova dhe parardhësi i saj Rosen Plevneliev, që dha dorëheqjen më parë këtë muaj pasi partia GERB e qendrës së djathtë e Borisovit e emëroi atë si kandidatin e saj presidencial në zgjedhjet e 23 tetorit.

Një tjetër ishte ministri i Administrimit të Fondit të BE-së i Bullgarisë Tomisllav Donçev, zëdhënësi i të cilit tha për AFP-në të mërkurën se "fondet janë pezulluar që në gusht, ndërsa hetohen parregullsi të mundshme".

"Ky është një veprim parandalues nga ana e qeverisë bullgare," shtoi ai.

Një projekt prej 27 milionë eurosh për rindërtimin e 110 km të rrjetit të furnizimit me ujë dhe të ujërave të zeza të Slivenit është më i madhi mes tetë nismave që janë pezulluar të cilat janë financuar sipas programeve funksionale të Zhvillimit Rajonal dhe Mjedisor të BE-së.

Në komente për Televizionin Kombëtar Bullgar shtetëror (BNT), Donçevi iu referua akuzave për shkelje të rregullave për prokurimet publike në zgjedhjen e kontraktuesve.

"Dyshimet janë se procedura ishte diskriminuese dhe dëmtoi konkurrencën," tha ai.

Borisovi u tha gazetarëve të mërkurën se çështja i ishte referuar tashmë prokurorisë dhe se Komisioni Evropian (KE) e kishte mirëpritur vendimin e qeverisë për të ngrirë financimin për projektet.

Akuzat e parregullsive u shfaqën në mes të korrikut, kur një grup i këshilltarëve bashkiakë të Slivenit vendosën në internet një dokumentar me titra në anglisht, të titulluar "Mafia e re".

Ata akuzuan Leçkovin, që ka drejtuar Slivenin gjatë tetë viteve të fundit dhe shpreson të rizgjidhet për një mandat të tretë si kryetar në tetor, për mbytjen e konkurrencës në tenderat për projektet e ndërtimit. Grupi tha se e kishte dërguar në Bruksel dokumentacionin që mbështeste pretendimet e tyre.

KE është duke përgatitur një letër për autoritetet bullgare në lidhje me projektet e financuara nga BE-ja në Sliven, njoftoi të mërkurën faqja e lajmeve në internet me qendër në Sofje, Mediapool, duke cituar zëdhënësin e Komisionerit të Bashkimit për Politikën Rajonale Johanes Hahn, Ton van Lierop.

Artikuj që kanë lidhje

Një ish-yll i futbollit bullgar, Leçkovi është kandidati i GERB-it për kryetar të Slivenit në zgjedhjet për pushtetin vendor në tetor. Borisovi u tha gazetarëve të mërkurën se nëse keqbërja nuk është vërtetuar, partia e tij nuk do të heqë mbështetjen e saj për të.

Duke njoftuar emërimin e tij në fillim të korrikut, kryeministri vuri në dukje se Leçkovi ka "pikat e dobta" të tij, si çdokush tjetër, por se do t'i "rregullojë" ato gjatë mandatit të tij të ardhshëm.

Ndërkohë, BNT citoi Leçkovin t'u ketë thënë gazetarëve në Sliven se ishte gati t'i paraqiste KE-së dhe autoriteteve të tjera kompetente të gjitha dokumentet e nevojshme, si dhe qëndrimin e tij mbi çështjen.

Kryetari u gjykua për akuza të abuzimit të pushtetit, por u shpall i pafajshëm në mars.

Kjo përmbajtje është autorizuar nga SETimes.com.