Mediat serbe përshëndet vendimin e gjykatës

29/07/2010

Gjykata Kushtetuese e Serbisë shfuqizoi shumicën e neneve të ligjit për informacionin publik, duke vënë në dukje se gjobat drakoniane kërcënonin lirinë e shtypit.

Nga Igor Jovanoviç për Southeast European Times në Beograd – 29/07/10

Vendimi gjykatës "ishte i vetmi i mundshëm", tha Ivan Cvejiç i agjencisë së lajmeve Beta. [Igor Jovanoviç/SETimes]

Parlamenti miratoi ligjin mbi informimin publik 11 muaj më parë, por më 22 korik, Gjykata Kushtetuese e Serbisë hodhi poshtë shumicën e neneve, kryesisht ato që vinin gjoba dërrmuese ndaj organeve të mediave që shkelnin rregullat.

Gjykata vuri në dukje se nenet e diskutueshëm rrezikonin lirinë e shprehjes publike.

"Kërcënimi i gjobave të mëdha mund të vërë në pikëpyetje mbijetesën e mediave dhe ajo që është më e rrezikshme, mund të shkaktojë vetë-çensurën, sepse as themeluesi, as i punësuari i një medie nuk do të jetë i lirë nga shqetësimi se mos ndëshkohen për atë që duhet të thonë lirisht," tha gjyqtarja Vesna Iliç-Preliç, duke lexuar vendimin e gjykatës.

Kryeredaktori i agjencisë së lajmeve Beta Ivan Cvejiç tha se vendimi i Gjykatës Kushtetuese "ishte i duhuri dhe i vetmi i mundshëm, por qeveria mbase nuk do të mësojë asgjë prej tij, sepse motivet fillestarë të saj për miratimin e Ligjit mbi Informacionit nuk ishin për të përmirësuar mjedisin e punës të mediave."

"Gazetarët mund të jenë të kënaqur me vendimin e gjykatës, por mjedisi i përgjithshëm për median, do të mbetet fatkeqsisht, shumë i keq. Para së gjithash për shkak të gjendjes ekonomike jashtëzakonisht të keqe, por gjithashtu për shkak të presionit politik dhe ekonomik," i tha Cvejiç SETimes.

Zëvendës/Presidentja e Shoqatës së Gazetarëve të Pavarur të Serbisë Jelka Jovanoviç tha se ligji "hapi rrugën për çensurimin redaktorial dhe vetë-çensurimin gazetaresk, veçanërisht mbështetur në atmosferën e frikës të krijuar gjatë miratimit të ligjit".

"Një ligj i mediave duhet të miratohet që do të përfshijë standartet profesionalë dhe të parandalojë monopolin e pronësisë, i cili është pengesa më e madhe e lirisë së shtypit," i tha Jovanoviç SETimes.

Qeveria nuk ka komentuar pas vendimit të gjykatës, ndonse disa deputetë kërkuan dorëheqjen e Ministrit të Kulturës Nebojsha Bradiç, si ministri i ngarkuar për median.

Partitë në pushtet, megjithatë e kanë hequr nga vetja përgjegjësinë për miratimin e ligjit që u shpall jokushtetues. Zëdhënësja e Partisë Demokratike Jelena Trivan hodhi poshtë spekullimet se ligji ishte miratuar për të kënaqur disa anëtarë të qeverisë.

"Eshtë e vërtetë se një diskutim mbi ligjin u bë brenda koalicionit në pushtet, por u arrit një mirëkuptim dhe qeveria qëndroi pas ligjit, që fatkeqsisht, siç mund të them nga këtu ku jam, pastaj u miratua. Gjykata Kushtetuese ka shfuqizuar dispozitat si jo-kushtetues dhe kjo është provë se gazetarët kanë një të drejtë të kritikojnë," u tha Trivan gazetarëve.