Rritja e Vahabit është shqetësuese për BiH

29/07/2010

Përhapja e Vahabit islamik radikal midis disa boshnjakëve vazhdon të jetë një shkak për shqetësim.

Nga Jusuf Ramadanoviç për Southeast European Times në Sarajevë -- 29/07/10

Vahabistët sulmuan stacionin policor në Bugojnë muajin e shkuar. [Getty Images]

Sulmi terrorist ndaj një stacioni policor në qytetin Bugojno të Bosnjës qëndrore muajin e shkuar, në të cilin u vra polici Tarik Ljubushkiç dhe u plagosën gjashtë të tjerë, është tregues i tensionit të shkaktuar nga bashkësia e vogël, por gjithnjë e më agresive Vahabi e vendit.

Hetimi në vazhdim zbulon se vendosësi i dyshuar i bombës Haris Çausheviç dhe ideatori i dyshuar Naser Palislamoviç kanë lidhje për një kohë të gjatë me sektin radikal islamik, ashtu si edhe tre të dyshuarit e tjerë të arrestuar.

Qeliza terroriste dyshohet se e kreu sulmin sepse ajo kundërshton një takim vjetor musliman në Ajatovica për të përnderuar një shenjtor të së kaluarës.

"Mendoj se qëllimi kryesor i lëvizjes Vahabi është që të krijojë një shtet fetar të pranueshëm vetëm për muslimanët, pa serbët dhe kroatët," i tha medias vendore Kryeministri i BiH Nikola Spiriç më parë këtë muaj.

Zyrtarët e Republikës Sërbska (RS) paralajmëruan për sulme të ngjashëm nga radikalët islamikë që marrin fonde nga Arabia Saudite dhe Irani. Zyrtarët paralajmëruan gjithashtu se veprimet e grupit mund të kenë pasoja negative për integrimin europian të BiH, duke përfshirë liberalizimin e vizave.

Ndërkohë, media e BiH ka përzjerë kazanin, duke kritikuar haptazi bashkësinë islamike të vendit dhe myftiun e madh të tij Mustafa Efendi Ceriç, për mos-distancimin e tyre aq sa duhet nga vahabistët.

Bashkësia muslimane i kundërshton akuzat, duke i bërë thirrje qeverisë që të marrë masa vendimtare anembanë BiH. Qëllimi i vahabistëve "është të shkaktojnë mosbesim, frikë dhe shqetësim, të na shkëputin nga ... integrimet [euro-atlantike]", thotë bashkësia.

Megjithë dhënien e sigurisë, një boshnjak që foli me SETimes tha se njerëzit janë të trembur. "Vështirësitë ekonomike janë përzjerë me propagandën agresive dhe të urrejtjes të Vahabit," tha ai, duke u ankuar ndaj suksesit në tërheqjen e të rinjve të pakënaqur boshnjakë.

"Si rregull, ata vijnë nga familje të varfëra me probleme të brendshme e konflikte dhe janë mendërisht njerëz të paqëndrueshëm. I tillë është rasti me [vendosësin e dyshuar të bombës Çausheviç]."

Të tjerë besojnë se është ndarja etnike e vendit që u paraqet vahabistëve një mundësi.

Marijana Grabovac, 56 vjeç, e përshkroi Bugojno si një "qytet të ndarë" në të cilin katolikët dhe boshnjakët shkojnë nëpër kafenetë përkatëse të tyre. "Ndarja shtrihet në vendet e punës dhe në jetën e përditshme e komunikacionet," i tha ajo SETimes.

"Po të mos bëhet diçka urgjent në nivelin shtetëror, edhe kjo bashkë-jetesë e vogël e mbetur mes katolikëve dhe muslimanëve do të prishet," tha banori i Bugojnos Ivan Budimir.

Qeveria duket t'i ketë marrë seriozisht shqetësimet e tilla. Ministri i sigurimit Sadik Ahmetoviç premtoi veprim vendimtar, duke thënë se sulmi dërgoi një alarm "për të vënë të gjithë lëvizjen Vahabi nën kontroll".