Opozita maqedonase nuk arrin fitore

24/05/2010

Megjithëse më në fund u bashkuan për të sfiduar Milo Gjukanoviç dhe partinë DPS të tij, partitë e opozitës në Malin e Zi nuk dolën mirë në votime, ndërsa SDP përfundon në rolin e "vendimtarit" në kryeqytet.

Nga Nedjeljko Rudoviç for Southeast European Times në Podgoricë -- 24/05/10

Mali i Zi zhvilloi zgjedhjet vendore të dielën (23 maj). [Getty Images]

Partia në pushtet e Malit të Zi, Partia Demokratike e Socialistëve (DPS), fitoi në shumicën e bashkive gjatë zgjedhjeve vendore të së dielës (23 maj). Në Podgoricë, megjithatë, ajo nuk do të jetë në gjendje që të formojë një qeveri të saj. Në vend të kësaj, do t'i duhet të kërkojë ndihmën e Partisë Social Demokratike (SDP), të kryesuar nga Ranko Krivokapiç. Sipas rezultateve paraprakë, koalicioni i kryesuar nga DPS do të ketë 28 vende në këshillin e qytetit të Podgoricës; opozita e bashkuar do të ketë 24, ndërsa SDP pesë.

Partitë e opozitës kishin shpresuar për një sukses në konkurrimet vendore pas bashkimit më në fund në një front të bashkuar. Por DPS e Kryeministrit Milo Gjukanoviç mori pjesën më të madhe të votave, megjithatë, duke arritur një fitore absolute në shtatë nga 14 bashkitë në garë: Bar, Danilovgrad, Savnik, Zhabljak, Beranë, Bijelo Polje dhe Rozhajë.

Në pesë të tjera, duhet të ketë një koalicion. Përveç Podgoricës, asaj i duhet një aleancë me SDP në Ulqin dhe Andrijevicë; dhe me partitë e vogla shqiptare dhe grupet qytetarë, në Plavë dhe Kolashin.

Opozita kundër DPS arriti të fitojë në Plevljë dhe Pluzhinë. Ajo ka ende shumicën në Golubovci, një pjesë e Podgoricës me asamblenë bashkiake të tij.

Ndërkohë, SDP e Krivokapiç e gjen veten në një rol "vendimtari".

"Do të punojmë në interes të të gjithë shtetasve dhe pas zgjedhjeve do të këshillohemi përsëri me qytetarët, sepse qyteti [i Podgoricës] u takon atyre. Qytetarët do të përcaktojnë cilat do të jenë përparësitë përfundimtare kur të hyjmë në koalicionë me partnerët e mundshëm për qeverinë e ardhshme të qytetit," u tha gazetarëve zëvendës/presidenti i partisë Vujica Lazoviç.

"SDP është i vetmi fitues i vërtetë i zgjedhjeve në Podgoricë," tha analisti Milosh Beshiç. "Eshtë e qartë se zgjedhësit e partisë përbëhen nga intelektualë të rinj, një elektorat progresiv. DPS është një fitues relativ."

Sipas Beshiç, votimi ishte një dështim për opozitën. "Ata ishin të bashkuar, ishin një koalicion i rëndësishëm, 12 parti së bashku, por nuk arritën të kërcënojnë DPS," tha ai.

Artikuj që kanë lidhje

Ndërkohe, udhëheqësit e opozitës nuk po pranojnë që të njohin rezultatet në Podgoricë, për shkak se pretendojnë se ka "një numër të ndjeshëm ankesash" rreth procesit të votimit.

Ata thonë se ndodhën parregullsi me votuesit që u dërguan nga një qendër votimi në tjetrën dhe me fallsifikime të mundshëm të listave të votuesve.

Ndërkohë, opozita po i vjen rrotull SDP. Bisedimet janë në proces mbi një koalicion të mundshëm në kryeqytet.

"Ata do të vendosin nëse duan gjendjen e tanishme dhe këtë për kushedi sa kohë, pas fjalëve të mëdha, kthimit për t'u përqafuar me DPS, Milo Gjukanoviç dhe [kryebashkiakun e tanishëm Miomir Mugosha], apo mund të vijnë me ne," tha udhëheqësi i opozitës Nebojsha Medojeviç.

Kjo përmbajtje është autorizuar nga SETimes.com.