Kryeqyteti maqedonas merr një pamje të re

18/03/2010

Një plan për të ndërtuar dhe rinovuar rreth 30 ndërtesa është duke u kryer.

Nga Goran Trajkov për Southeast European Times në Shkup -- 18/03/10

Projekti përfshin ndërtimin dhe rinovimin e 30 ndërtesave në zonën e qendrës së Shkupit. [Tomislav Georgiev/SETimes]

Një rregullim tërësor i kryeqytetit maqedonas po ecën përpara sipas planit, ndërsa qeveria shfaqi një paraqitje me video muajin e kaluar, e cila jep hollësi për ndryshimet. Qëllimi është të bëhet Shkupi më tërheqës dhe të rritet funksionaliteti administrativ.

Ministria e kulturës dhe bashkia e Qendrës së Shkupit janë të ngarkuar me zbatimin e projektit të quajtur "Shkupi 2014". Ai përfshin ndërtimin dhe rinovimin e 30 ndërtesave në zonën e qendrës së Shkupit.

Monumente të shumtë janë parashikuar gjithashtu në projekt, përfshirë një statujë të Aleksandrit të Madh që do të vendoset mbi një shatërvani të ri në Sheshin qendror Maqedonia, deri në fund të vitit.

Kryebashkiaku i Qendrës, Vladimir Todoroviç shpjegoi se projekti i ofron Shkupit një "tërësi arkitekturore dhe urbane që do t'i japë qytetit një shprehje artistike".

Arkitektja veterane Biljana Sekova i tha SETimes se projekti është shumë ambicioz dhe i sjell Shkupit arkitekturën dhe përmbajtjen artistike aq të duhur. "Eshtë një përzjerje e stileve të lashtë dhe barok, të cilëve i është shtuar një ndjesi e qytetit të vjetër të Shkupit," tha ajo.

Statuja të Perandorit Romak Justinian I, vendlindja e të cilit mund të ketë qenë në afërsi të Shkupit të sotëm dhe të Carit Samoili të mesjetës, do të krijohen në mermer. Monumentet e tjerë, duke përfshirë ato të shenjtëve patronë europianë dhe apostujve sllavë Cirili dhe Metodij do të bëhën në bronx.

Ndërtimi i dy urave të reja për këmbësorët mbi Lumin Vardar, Ura Sy, e emëruar sipas gjysmërrethit karaktaristik të saj dhe Ura e Artit me një formë krejt të veçantë, tashmë ka filluar.

Projekti përfshin gjithashtu shtimin e një kati tjetër dhe vendosjen e një kubeje dhe kupolave në ndërtesën e parlamentit. Një monument i Nikola Karev, presidenti i republikës jetëshkurtër të Krushevës më 1903, do të vendoset përpara ndërtesës. Pranë tij, një hark i ri do të shërbejë si një hyrje në sheshin tjetër qendror të Shkupit, Pella.

Pranë përfundimit janë fasadat dhe ndërtesat e reja përgjatë Vardarit: Gjykata Kushtetuese, Muzeumi Arkeologjik dhe selia e policisë financiare. Ndërtesa zyrash të reja për ministrinë e jashtme dhe arkivat e shtetit, midis agjencive shtetërore të tjera, janë në fazat fillestare të ndërtimit.

Ndonëse i pritur mirë nga shumica e njerëzve, Shkupi 2014 ka ngjallur një debat në vazhdim midis qeverisë dhe Social Demokratëve të opozitës. Partia pretendon se projekti është i tepruar dhe do të kushtojë 200 milionë euro gjatë krizës ekonomike.

Megjithatë, Kryebashkiaku i Shkupit Koce Trajanovski thotë se kosto e parashikuar është 80 milionë euro. Paratë do të vijnë nga disa buxhete shtetërorë vjetorë, si dhe nga buxhetet bashkiakë të Shkupit dhe Qendrës, si dhe nga investitorë privatë.

Disa OJQ aleate me opozitën kanë bërë përpjekje për protesta publike, duke argumentuar se fondet do të ishte më mirë që të harxhohen për të luftuar varfërinë.

Të gjithë kanë të drejtë për opinionin e tyre, thotë Kryeministri Nikola Gruevski, por ai vë në dukje se ndërtesat e reja në fund të fundit do të kursejnë para nga zvogëlimi i qirave që disa agjenci duhet të paguajnë. Ai nënvizon gjithashtu vendet e punës në ndërtim të krijuara dhe zotohet të vazhdojë ndërtimin anembanë vendit.