Fabrika e makinave Zastava e Serbisë bëhet pjesë e Grupit Fiat

24/12/2009

Viti po mbyllet mirë për një fabrikë serbe.

(Blic - 24/12/09; AKI, AP, DPA, AFP, BBC, Beta, B92, Serbian Government - 23/12/09)

Një punëtor i Zastavës në linjën e prodhimit në fabrikë në Kragujevac. [Getty Images]

Fiat dhe qeveria serbe nënshkruan të mërkurën (23 dhjetor) një aneks për marrëveshjen e tyre të ndërmarrjes së përbashkët të 2008 që do të lejojë prodhuesin italian të makinave që të marrë fabrikën e automobilëve Zastava të vendit ballkanik. Dokumenti u nënshkrua në Beograd nga Zëvendës/Presidenti i Grupit Fiat Alfredo Altavilla, CEO i Fiat Automobili Srbija, Xhovani De Filipis dhe Zëvendës/Kryeministri serb Mllagjan Dinkiç.

"Kjo është një ditë e madhe për industrinë serbe," tha Dinkiç. Sipas marrëveshjes së të mërkurës, Fiat do të marrë një pjesë prej 67% të aksioneve të fabrikës së makinave sapo të ketë paguar gjysmën e pjesës prej 200 milionë euro në kapitalin themelues të ndërmarrjes së përbashkët, siç është parashikuar në marrëveshjen e shtatorit 2008.

Altavilla tha se paratë do të transferohen deri nga fundi i këtij viti. Kësti i dytë prej 100 milionë euro do të paguhet më 2010, kur Fiat do të investojë gjithashtu 700 milionë euro për të modernizuar fabrikën e makinave në Kragujevac, qyteti i katërt i madh i Serbisë, rreth 140 km në jug të Beogradit.

Qeveria serbe do të mbajë 33% të Zastavës, do të siguroja prona dhe paisje për ndërmarrjen e përbashkët dhe do të kontribuojë me 50 milionë euro në kapitalin themelues të saj.

Prodhimi vjetor i fabrikës pritet të arrijë në 200,000 makina deri më 2011. Sipas marrëveshjes së të mërkurës, po atë vit, fabrika e cila tashmë prodhon Fiat Punto, do të nisë prodhimin e dy modeleve të reja për t'u shitur në tregjet e SHBA dhe ato europiane.

Dinkiç tha se ai pret që eksportet të fitonin rreth 2 miliardë euro në vit. Sipas tij, ndërmarrja e re do të punësojë rreth 2,500 punëtorë.

Zastava, e cila është e njohur për modelin Jugo, prodhoi 16,000 Fiat Punto për tregun vendas këtë vit.

Duke folur në një konferencë shtypi pas nënshkrimit të së mërkurës, Altavilla e vlerësoi Presidentin serb Boris Tadiç për rolin personal të tij në arritjen e marrëveshjes.

"Tadiç na dha mbështetjen e tij dhe i jam vërtet mirënjohës," tha ai duke falenderuar gjithashtu qeverinë serbe dhe veçanërisht Dinkiç për bashkëpunimin dhe angazhimin e tyre.

Në shtator të vitit të kaluar, zyrtarët serbë përshëndetën marrëveshjen me prodhuesin e makinave më të madh të Italisë si investimin më të madh të huaj në vite.

Por zbatimi i projektit u ngadalësua për shkak të trazirës financiare botërore.

"Kjo do të thotë se kriza ekonomike është pranë fundit për Serbinë," tha Dinkiç përpara nënshkrimit të aneksit të mërkurën.