Zgjedhjet presidenciale rumune shkojnë në balotazh

23/11/2009

Banorët lokalë shkuan në qendrat e votimit me numra të mëdhenj të dielën për raundin e parë zgjedhjeve.

Nga Paul Kiokoiu për Southeast European Times në Bukuresht -- 23/11/09

Pjesëmarrja në zgjedhje ishte më e lartë se ç'pritej të dielën (22 nëntor). [Gabriel Petresku/SETimes]

Ish partnerët politikë Traian Basheshku dhe Mirçea Xheoana do të jenë përballë njeri tjetrit në një nga balotazhet më të ngushta të historisë së zgjedhjeve presidenciale post-komuniste.

Sipas rezultateve të pjesëshme të botuara nga Byroja Qendrore e Zgjedhjeve (BEC) të hënën (22 nëntor) pas numërimit të votave, Bashesku fitoi 32.8% të votave në raundin e parë të zgjedhjeve të dielën, ndërsa Xheoana mori 29.7%. Liberali Krin Antonesku doli i treti me 20.8%.

Pjesëmarrja ishte 53.4%, një nga më të lartat në vite.

Rumunët votuan gjithashtu për një referendum të diskutueshëm thirrur nga Bashesku për një parlament me një dhomë dhe reduktimin e deputetëve nga 471 në 300. Sipas një sondazhi votuesish të Qendrës për Sociologjinë Urbane e Rajonale (CURS), 87.4% votuan në favor të reduktimit të numrit të ligjebërësve ndërsa 77.4% mbështetën një parlament me një dhomë.

Bashesku përshëndeti këtë diferencë si "të jashtzakonshme".

"Unë po i kërkoj kështu parlamentit, pas verifikimit të refrendumit, të thërresë komisionin e ndryshimit të kushtetutës," tha Bashesku.

Sipas ekspertëve, suksesi mund të provojë një avantazh vendimtar zgjedhor për Basheskun në raundin e dytë.

Por Xheoana duket po aq me besim. "Ne kemi punuar shumë për të ardhur këtu. Ne do të punojmë më shumë dhe do të fitojmë së bashku në 6 dhjetor," tha ai. Kreu social-demokrat premtoi një fund të shpejtë të krizës politike po të bëhej president.

"Si president, unë do të sjell në krye të vendit deri në Krishtlindje, një ekip njerëzish më të ndershmit e më kompetentët nga brenda dhe jashtë shumicës parlamentare," tha ai.

Vendosja e një qeverie të qëndrueshme është një kusht kyç që Rumania të marrë këstin e fundit të kredisë prej 20 miliard euro nga FMN.

Zgjedhjet u mbikqyrën nga afër pasi në rrjedhë të fushatës u ngritën dyshime për mashtrime.

Patrullat e policisë ndaluan autobuzat për të parandaluar atë që ata e quajnë "turizëm zgjedhor", njerëzit që transportohen nga njeri vend në tjetrin për votim të shumfishtë.

Votimi presidencial i së dielës ishte i pari në Rumani që kur vendi u bashkua me BE në 2007 dhe i gjashti që nga rënia e komunizmit në 1989.