Mijëra vetë ndjekin funeralin e Patriarkut Pavle

20/11/2009

Patriarku i Kishës Ortodokse serbe Pavle u varros të enjten në oborrin e Kishës të Manastirit të Rakovicës në Beograd. Më tepër se 600,000 pasues besimtarë, zyrtarë shtetërorë dhe kishtarë morën pjesë në varrim.

Nga Bojana Milovanoviç për Southeast European Times në Beograd --20/11/09

Funerali u parapri nga një liturgji në Kishën e Tubimeve në Beograd. [Nikola Barbutov/SETiimes]

Qindra mijëra vetë nga Serbia, Mali i Zi, Bosnjë dhe Herzegovina dhe Kroacia pritën jashtë kishës së Tubimeve të Beogradit të enjten (19 nëntor) për t'i dhënë nderimet e fundit Patriarkut të Kishës Ortodokse serbe Pavle.

Pavle, 96 vjeç, vdiq të dielën. Për katër ditë ai u nderua nga besimtarët dhe pasuesit.

Funerali i tij u parapri nga një liturgji në Kishën e Tubimeve dhe një shërbesë në Tempullin e Shën Savës. Një turmë prej më shumë se 600,000 vetësh u mblodhën për shërbesën që u drejtua nga Patriarku Ekumenik Bartolemeu.

"Popull i Serbisë, filloni të qani, të ngashëreheni hidhur dhe të shprehni dhimbjen tuaj sipas meritave të tij," tha Bartolemdeu. Ai theksoi se Pavle ishte një teolog me njohuri të gjera, një njeri mëshirëplotë dhe paqësor e mendjehapur.

Presidenti serb Boris Tadiç, që ndoqi funeralin, kujtoi fjalët e patriarkut: "Le të jemi njerëzorë dhe të mos i përgjigjemi kurrë të keqes së të tjerëve me të keqen brenda vetes sonë."

"Unë besoj se ndaj opinionin e qytetarëve serbë kur shpreh mirënjohjen time ndaj shënjtërisë së tij Patriarkut Pavle për atë që ka qenë dhe prapë është përpara ne të gjithëve, me veprat dhe fjalët e tij për të qënë kurdoherë njerëzorë," tha Tadiç.

Pas një periudhe 40 ditore zie, Kisha Ortodokse serbe do të zgjedhë një patriark të ri. Kreu i ri i kishës do të zgjidhet nga tre kandidatë: peshkopë me më shumë vota nga anëtarët e Sinodit. Zarfat që përmbajnë emrat e kandidatëve do të vihen në Librin e Ungjillit dhe patriarku i ri do të zgjidhet nga "Shpirti i Shenjtë" pasi një prift i zgjedhur do të heqë zarfin me emrin e patriarkut të ri.

Kur Pavle u bë patriark 19 vjet më parë, ish-peshkop i Rashkës dhe Prizrenit, kjo ishte një surprizë. Pavle erdhi në krye të kishës më 1990, në një kohë kur forca e saj kishte rënë pas një periudhe të gjatë të rendit komunist dhe kur sapo fillonin luftrat në ish-Jugosllavi.

"Unë jam këtu për të udhëhequr serbët në një luftë për ruajtjen e Serbisë së Madhe. Megjithatë, nëse ruajtja e Serbisë së Madhe kërkon krim, unë e refuzoj atë, le të shkojë Serbia e Madhe. Nëse ruajtja e Serbisë së vogël kërkon krim, përsëri unë e refuzoj atë, le të shkojë Serbia e vogël. Nëse ruajtja e qoftë një serbi të vetëm kërkon krim, përsëri unë e refuzoj atë, le të shkojmë të gjithë," tha ai.