Rishikohet ndalimi i pirjes së duhanit në Kroaci

17/09/2009

Pirja e duhanit në kafene do të lejohet përsëri nëse përmbushen kërkesat bazë.

Nga Natasha Radiç për Southeast European Times në Zagreb -- 17/09/09

Pronarët e kafeneve po përshtaten ndaj kushteve të reja. [Getty Images]

Grupi në favor të pirjes së duhanit në Kroaci shënoi një fitore të enjten (10 shtator) kur parlamenti miratoi një ndryshim ndaj ndalimit të diskutueshëm të pirjes së duhanit. Ndryshimi lejon pirësit e duhanit që ta ndezin atë në vende të caktuara në kafene, nëse ato kanë sistemin e duhur të ventilimit dhe vënë shenja të dukshme që paralajmërojnë rreziqet e duhanit.

Restorantet, spitalet, shkollat, zyrat dhe baret nuk bien nën sferën e këtij ndryshimi dhe pirja e duhanit është ende e ndaluar në këto mjedise.

Ndryshimi vjen pas një proteste të pronarëve të kafeneve dhe restoranteve që pretendojnë se bizneset e tyre pothuajse kanë falimentuar që kur ligji, një prej më kufizuesve në Europë lidhur me ndalimin e duhanit, u zbatua në maj.

Gjatë muajve të ngrohtë të verës, pirësit e duhuanit shpesh dalin jashtë për ta ndezur atë, por me dimrin që është pranë, pronarët e kafeneve parashikojnë një rënie thelbësore të biznesit.

Një peticion kundër ndalimit filloi pothuajse menjëherë pasi ligji u miratua dhe qeveria e vuri re këtë. Propozimi i ri u hartua me ndihmën e ministrisë së turizmit, sindikatës së pronarëve të restoranteve dhe kafeneve dhe zyrtarëve qeveritarë.

Pronarët e lehtësuar të kafeneve shpresojnë se ligji më liberal do t'i kthejë pirësit e duhanit në lokalet e tyre.

Zheljko Striziç, një pronar kafeneje në bregdet, thotë se me ndryshimin e ri, biznesi i tij ka një të ardhme. Ai ka nisur të bëjë ndryshime në 70 metrat katrorë të kafenesë së tij për të ndarë pirësit e duhanit dhe ata që nuk pijnë duhan dhe ka blerë tashmë një poster "duhani vret".

Ministri i Shëndetësisë Darko Milinoviç, një përkrahës i vendosur i ligjit të ndalimit të duhanit, kundërshtoi spekullimet e medias se qeveria bëri ndryshime në ligj nga presioni i shoqatës së pronarëve të kafeneve, biznesi i të cilëve ra deri në 75%.

"Ne sërish do të punojmë shumë për të ruajtur shëndetin e shtetasve dhe ky vendim nuk u bë nën asnjë presion," tha Milinoviç, duke shtuar se pirja e duhanit përbën një problem të rëndë në Kroaci, pasi më shumë se 13,000 vdesin çdo vit nga sëmundje të lidhura me të.

Një në tre kroatë pi duhan.