Udhëheqësit mbështesin pranimin e Ballkanit në BE

22/06/2009

Presidentët e Europës Juglindore dhe Qendrore thonë se mbështesin futjen e vendeve të Ballkanit në BE dhe se kriza ekonomike nuk është arsye për të ndaluar zgjerimin.

Nga Igor Jovanoviç për Southeast European Times në Beograd -- 22/06/09

Udhëheqësit përgatiten për një foto gjatë takimit të nivelit të lartë të 16-të të vendeve nga Europa Juglindore dhe Qendrore në Novi Sad, Serbi, të premten (19 qershor). [Getty Images]

Qyteti serb i Novi Sadit, rreth 80 km në veri të Beogradit, priti një takim të nivelit të lartë të Europës Qendrore të shtunën (18 qershor) . Presidentët nga 14 vende diskutuan tema të tilla si integrimi europian, ekonomia botërore dhe çështje të energjisë.

Presidentët nga Austria, Bosnje dhe Herzegovina, Bullgaria, Kroacia, Italia, Maqedonia. Molldavia, Mali i Zi, Polonia, Sllovakia, Republika Çeke, Sllovenia, Ukraina dhe Serbia, morën pjesë në takimin e nivelit të lartë "Puna e Përbashkët në Kapërcimin e Sfidave të Tre E-ve: Ekonomi, Energji dhe Integrim Europian".

Udhëheqësit shprehën mbështetje për pranimin e vendeve të Ballkanit në BE, duke këmbëngulur se kriza ekonomike nuk duhet të ishte një justifikim për të ndaluar zgjerimin e Bashkimit.

"Kriza ekonomike është prova vendimtare që do të tregojë se anëtarët e BE mund të veprojnë së bashku," tha Presidenti italian Xhorxhio Napoletano.

Presidenti serb Boris Tadiç, i cili priti veprimtarinë, tha se integrimi i vendeve të Ballkanit Perëndimor është në interesin e Europës dhe shtoi se heqja e kufizimit të vizave në rajon do të ishte provë e qartë se vendet e Ballkanit janë të mirëpritur në bashkësinë europiane.

Presidenti maqedonas Gjorge Ivanov ishte dakord me këtë. "Shumë nga ne e dinë personalisht se si është të jesh jashtë institucioneve europianë dhe tregjeve europianë. Nuk duhet mbrojtur një Europë përjashtuese dhe e mbyllur."

Presidenti polak Leh Kaczinski dha mbështetjen e tij, duke kujtuar se Polonisë ju deshën 13 vjet për të "udhëtuar" për në BE. "Ne kemi hyrë në atë dhomë [BE] po kjo nuk do të thotë se duam të mbyllim derën pas nesh. Ajo dhomë është mjaft e madhe dhe duhet të bëhet e arritshme për të gjithë," tha ai.

Një tjetër çështje në tryezë ishte kriza e gazit midis Rusisë dhe Ukrainës, e cila arriti kulmin në janar dhe tregoi se sa të cënueshme janë vendet europianë nga vartësia e energjisë.

Presidenti i Ukrainës Viktor Jushçenko tha se vendi i tij garantoi tranzitin "e sigurtë dhe të vazhdueshëm" të gazit nëpërmjet territorit të tij dhe bëri thirrje për krijimin e një tregu të përbashkët gazi, të ngjashëm me tregun e elektricitetit.

Siguria ishte forcuar në Novi Sad gjatë takimit të nivelit të lartë. Rrugët e afërta ishin mbyllur dhe njësitë e policisë ruanin hotelet ku qëndronin presidentët.