Nivelet e varfërisë në Shqipëri në rënie

25/05/2009

Rritja ekonomike dhe reformat kanë qenë lajme të mira për të varfërit e Shqipërisë, por kriza e tanishme globale financiare përbën një sfidë.

Nga Manjola Hala për Southeast European Times në Tiranë -- 25/05/09

Studimi u krye nga Instituti Shqiptar i Statistikës, Banka Botërore dhe Programi i Zhvillimit i Kombeve të Bashkuara. [Getty Images]

Varfëria në Shqipëri ra ndjeshëm midis 2002 dhe 2009, sipas një studimi të ri. Ai zbuloi se numri i shqiptarëve që jetojnë nën nivelin e varfërisë u zvogëlua nga 25.4% më 2002 në 12.4% më 2008.

Studimi u krye nga Instituti Shqiptar i Statistikave, Banka Botërore dhe Programi i Zhvillimit i Kombeve të Bashkuara (UNDP).

Ishin rreth 800,000 vetë më 2002, por më shumë se gjysma e tyre, 435,000 dolën nga varfëria deri më 2008, sipas studimit. Varfëria është ulur në mënyrë dramatike në zonat rurale dhe konsumi real ka qenë në rritje anembanë vendit, due u rritur me 7% që nga 2005.

"Zona të gjera të Shqipërisë vazhdojnë të dëshmojnë rënien e normave të varfërisë," tha një njoftim për shtyp i Bankës Botërore. "Zonat qendrore kanë patur zvogëlimin më të madh në normat e varfërisë që nga 2005."

Arsyet për prirjen pozitive përfshijnë rritjen e madhe të PKB-së, reformat ekonomike, zgjerimin e infrastrukturës dhe qeverisjen më të mirë, tha studimi.

Administrata e qendrës së djathtë e Kryeministrit Sali Berisha pretendon meritën. "Zvogëlimi i varfërisë ... tregon suksein e reformave të ndërmarra nga qeveria," i tha një konference shtypi Ministrja e Integrimit Majlinda Bregu.

Partitë e opozitës, megjithatë, thonë se lajmet nuk janë të gjitha të mirë. Ato vënë në dukje pabarazinë midis rajoneve dhe popullsive të ndryshme.

"Pabarazia e të ardhurave rajonale për çdo familje është e lartë në Shqipëri. Varfëria në qarkun e Lezhës arrin në 31%, në Kukës 37% dhe në Dibër 41%, që janë mbi mesataren kombëtare," tha Ervin Bushati i Partisë Socialiste, duke ju referuar tre zonave malore në veri të vendit.

Në të vërtetë, studimi zbuloi se zvogëlimi i varfërisë në zonat malore nuk ka shkuar si me pjesën tjetër të vendit.

"Të dhënat tregojnë një ngadalësim të dukshëm në normën e zvogëlimit të varfërisë në zonat malore, ku përqindja vazhdon të jetë më e larta dhe që ka parë pak ndryshim që nga 2005," tha Banka Botërore.

Studimi u mbështet kryesisht në të dhënat nga matja e standardeve jetësorë prej sondazheve të mbledhur në prill-qershor 2002 dhe qershor-gusht 2008 nga një mostër prej rreth 3,6000 familjesh.

Rezultatet nuk pasqyrojnë ndikimin e krizës aktuale globale financiare. Përfaqësuesit e Bankës Botërore dhe UNDP paralajmërojnë se rënia e varfërisë mund të ndalet ose të kthehet në të kundërt nëse nuk merren masat e duhura. FMN ka sinjalizuar se kohë më të vështira mund të jenë përpara për shqiptarët duke parashikuar një rënie të rritjes së PKB-së në 0.4% këtë vit, nga 6.8% më 2008.