Arabia Saudite bëhet shteti i 58-të që njeh Kosovën

22/04/2009

Arabia Saudite u bë vendi i 58-të që njeh pavarësinë e Kosovës. Ndërsa ata në Prishtinë shprehin mirënjohjen e tyre, zyrtarët serbë thonë se Gjykata Ndërkombëtare e Drejtësisë duhet të vendosë mbi pavarësinë e ish-krahinës.

Nga Besa Beqiri për Southeast European Times në Prishtinë -- 22/04/09

Presidenti i Kosovës Fatmir Sejdiu tha se vendimi saudit do "të ketë një ndikim mbi shtetet e tjera në botën arabe dhe Konferencën Islamike". [Getty Images]

Ambasadori saudit në OKB, Khalid al-Nafise njoftoi të hënën (20 prill) se Mbretëria e Arabisë Saudite ka njohur shtetin e Kosovës. Al-Nafise i konfirmoi lajmin Ministrit të Jashtëm të Kosovës Skënder Hyseni në një bisedë telefonike. Arabia Saudite është shteti i 58-të që njeh pavarësinë e ish-krahinës serbe.

Hyseni i shkroi të martën homologut të tij saudit, Princit Saud Al-Faisal, duke shprehur përkushtimin e Kosovës ndaj krijimit të marrëdhënieve të afërta dhe të plota midis të dy vendeve.

Sipas një zyrtari të ministrisë së jashtme në Riad, Mbretëria e mori vendimin e saj "në përputhje me lidhjet ekzistuese fetare e kulturore me popullin e Kosovës dhe me respektin për popullin e Kosovës për të përftuar pavarësinë", njoftoi Saudi Press Agency.

Mbretëria "shpreson se zhvillimi do të kontribuojë pozitivisht për të forcuar shtyllat e sigurisë dhe stabilitetit në Kosovë dhe vendet fqinjë", tha zyrtari.

Në Prishtinë, Presidenti Fatmir Sejdiu tha se vendimi saudit do "të ketë një ndikim mbi shtetet e tjera në botën arabe dhe Konferencën Islamike".

Kryeministri Hashim Thaçi tha se njohja saudite do t'u dërgojë një mesazh vendeve të tjerë dhe ato do të pasojnë shembullin. "Kjo njohje ... është një njohje e veprimtarisë së fuqishme diplomatike të Kosovës," tha Thaçi.

Hyseni i tha transmetuesit publik të Kosovës RTK se vendimi i Saudisë tregon qartë se seanca e Gjykatës Ndërkombëtare të Drejtësisë (ICJ) mbi ligjishmërinë e pavarësisë së Kosovës nuk dëmton njohjen diplomatike të kërkuar nga Prishtina.

Në Beograd megjithatë, Ministri i Jashtëm serb Vuk Jeremiç e quajti vendimin e Riadit për të njohur Kosovën, për të ardhur keq. Ai argumentoi se ICJ duhej të deklarojë opinionin e saj mbi ligjishmërinë e pavarësisë së Kosovës.

Shumë blogerë dhanë gjithashtu gjykime. "Mrekulli! Tani Katari, Bahreini, Omani, Jordania, Jemeni, Libani, Kuvaiti etj. do të pasojnë udhëheqësin e tyre! Faleminderit," shkroi të hënën Heki në B92 me qendër në Beograd.

Radoslav drejton vëmendjen në rastin e ICJ në proces. "Unë pres më shumë vende arabe aleate të SHBA të njohin Kosovën, por kjo prapë nuk do të ndryshojë asgjë... Nëse vendimi [i ICJ] shkon në favor të Serbisë, të gjitha njohjet e mëparshme hidhen poshtë," thotë ai.

Por Ivica ka një tjetër mendim. "Eshtë shumë e rëndësishme që njerëzit në Serbi të jenë me mendje të hapur dhe të shohin një të ardhme së bashku me shqiptarët e Kosovës. Eshtë e sigurtë se pas Arabisë do të ketë më shumë vende në Azi që do ta njohin Kosovën si një shtet."

"Ky është një lajm i madh; megjithatë, unë thjesht vras mendjen se pse Serbia nuk e bën më të lehtë jetën për gjithsecilin: të njohë Kosovën dhe t'i lërë serbët vendas të shkojnë përpara me jetën e tyre," shkruan Kosovar.