Serbia synon duhanpirjen

20/04/2009

Serbia është midis vendeve evropiane me numrin më të madh të duhanpirësve. Ministria e shëndetësisë ka propozuar kufizime të mëtejshme të duhanpirjes në hapësira publike e të mbyllura.

Nga Bojana Milovanoviç për Southeast European Times në Beograd -- 20/04/09

Rreth 30% e grave në Serbi pinë duham. [Nikola Barbutov/SETimes]

Serbia është midis vendeve evropiane me përqindjen më të lartë të duhanpirësve. Sipas ministrisë së shëndetësisë, rreth një e treta e 7 milion e ca shtetasve të Serbisë pinë duhan, gati 38% e burrave dhe 30% e grave.

Srmena Krstev, presidente e Komisionit të Serbisë për Parandalimin e Duhanpirjes i tha Southeast European Times se mosha në të cilën niset duhani po bie paprerë. "Rreth 8% e të rinjve të moshave 13 deri 15 vjeç ndezin herë pas here një cigare. Një e treta e tyre e ka patur cigaren e parë në moshën dhjetë vjeç," tha ajo.

Në disa vende si Greqia dhe Turqia, gati gjysma e burrave pinë duhan. Megjithatë, përqindja e grave që e pinë atë në këto vende është shumë më e ulët se në Serbi. " 'Rivali' i vetëm i Serbisë në numrin e duhanpirësve midis vendeve evropiane është Bosnje dhe Herzegovina," tha ajo.

Për t'ju drejtuar problemeve në rritje nga duhanpirja, ministria e shëndetësisë ka propozuar amendamente ndaj ligjit ekzistues të ndalimit të duhanpirjes në hapësira të mbyllura. Ligji i ri do të jetë më i ashpër dhe do të mbulojë të gjithë hapësirat publike dhe ato të punës, duke përfshirë kafenetë, restaurantet dhe strukturat e tjera të shërbimeve.

Beogradi ka ndërmend të harmonizojë ligjin me ato të Evropës. Zbatimi do të bëhet me faza: së pari do të ndalohet duhanpirja në vendet e punës; pastaj, duke ngritur zona duhanpirjeje në strukturat publike si restaurantet; dhe më së fundi, ndalimi i kësaj praktike në të gjitha hapësirat publike. Zbatimi i ligjit nuk do të jetë i lehtë pasi pritet rezistencë. Për të shmangur problemet e mundëshme, "dokumenti...do të jetë shumë i qartë dhe zbatimi i tij i përcaktuar saktë," tha Krstev.

Ndërgjegjësimi i efekteve të dëmshme të duhanit po rritet, veçanërisht për rreziqet e tymosjes nga të dytët. "Në qoftë se një e treta e popullsisë pi duhan, ne na duhet të mendojmë për dy të tretat e tjera...shëndeti i të cilëve mundet të dëmtohet gjithashtu", shtoi ajo.

Ministria e shëndetësisë ka në plan një sërë fushatash intensive për të përhapur mesazhin më sistematikisht, tha Krestev. Një fushatë aktuale "Pirja e duhanit është një vrasës serial" synon të trembë duhanpirësit që të bëhen merak për shëndetin e tyre. Ajo ndërkaq ka dhënë rezultat: nga 2006 në 2008, 7% e burrave dhe 3% 3 grave kanë lënë duhanin.

Fushata tjetër do t'u bëjë thirrje duhanpirësve të "Presin pirjen e duhanit". Objektivi është t'u tregohet duhanpirësve shkaqet e numrit të madh të sëmundjeve disa nga të cilat mund të jenë vdekjeprurëse.

Cigaret janë shkaku më i përhapur i sëmundjeve malinjë, goditjeve në tru e në zemër. Duhanpirja është veçanërisht e dëmshme gjatë shtatzanisë dhe mund të shkaktojë probleme shëndetësore tek fëmijët edhe pas foshnjërisë.