Gul i Turqisë bën vizitë të rëndësishme në Irak

24/03/2009

Presidentët turk e iraken u zotuan të hënën të bashkëpunojnë në dhënien fund të veprimtarive terroriste të rebelëve kurdë që përdorin bazat në Irkaun e veriut për të nisur sulme ndaj Turqisë.

(Zaman, Hurriyet, Washington Post - 24/03/09; Reuters, AFP, DPA, Euronews, VOA - 23/03/09)

Presidenti i Irakut Xhalal Talabani (i dyti nga e majta) dhe presidenti turk Abdullah Gul (në mes) kalojnë një revistë të rojeve të nderit të hënën (23 mars) në Bagdad. [Getty Images]

Presidenti turk Abdullah Gul tha të hënën (23 mars) se shtypja nga Iraku e verpimtarive të Partisë terroriste të Punëtorëve të Kurdistanit (PKK) është një kërkesë për bashkëpunimin e plotë midis Ankarasë dhe Bagdadit.

"Ndërsa normalizohet, Iraku duhet të kontrollojë territorin e vet dhe të mos lejojë terroristët të operojnë," tha presidenti përpara nisjes së udhëtimit të tij dy-ditor në Bagdad, i pari nga një udhëheqës i shtetit turk në 33 vjet. "Irakut i duhet të frenojë organizatën terroriste dhe vetëm atëhere ai do të ketë 100% bashkëpunim me fqinjët e vet."

Gul pati një pritje të ngrohtë nga presidenti i Irakut Xhelal Talabani i cili e siguroi atë se Iraku do të bënte çdo përpjekje për të ndalur veprimtaritë e rebelëve terroristë të PKK.

Anëtarët e grupit terrorist kanë përdorur bazat e tyre në malet e Irakut të veriut si një tramplinë për sulmet brenda Turqisë.

Duke theksuar se kushtetuta e Irakut i ndalon veprimtaritë me armë, Talabani, që është vetë një kurd, tha të hënën se PKK duhet ose të lërë armët ose të lërë teritorin e vendit.

"Çfardo sulmi ndaj fqinjës sonë demokratike [Turqisë] do të konsiderohet sulm terrorist dhe nuk i shërben popullit [kurd] që ata pretendojnë se përfaqësojnë," tha kreu iraken në një konferencë të përbashkët shtypi me Gul. "Prania e forcave të PKK në truallin e Irakut ka dëmtuar fshatarët e mbi 500 fshatrave kurde."

Prania e PKK në Irak është çështja më e diskutueshme në marrëdhëniet turke-irakene. Ankaraja ka akuzuar shpesh kurdët e Irakut dhe administratën e tyre autonome në Irakun e veriut, qeverinë rajonale kurde (KRG) për tolerimin dhe bile ndihmën ndaj PKK.

"Është koha t'i japim fund këtyre problemeve sepse ato prishin marrëdhëniet midis vendeve tona," tha Gul duke theksuar nevojën për veprim të përbashkët kundër terrorizmit.

Më parë këtë vit, Turqia, Iraku dhe Shtetet e Bashkuara ngritën një qendër komande të përbashkët për të mbledhur inteligjencë për të ndihmuar dhënien fund të veprimtarive të PKK.

"Terrorizmi dhe ata që e praktikojnë atë janë një mallkim. Ata duhen ndëshkuar," citonte DPA të thoshte Gul. " Është koha t'u jepet fund këtyre problemeve që dëmtojnë marrëdhëniet mirdis Turqisë dhe Irakut."

Midis zyrtarëve që Gul ka në plan të takojë në Bagdad janë kryeministri Nuri al-Maliki dhe ministri i jashtëm Hoshjar Zebari si dhe Neçirvan Barzani, kryeministër i KRG.

Mënjanë problemit të PKK, bisedimet në Bagdad pritet të përqëndrohen në marrëdhëniet ekonomike dhe të tregtisë.

Vendet nga sa thuhet po kërkojnë të rritin tregtinë e ndërsjelltë që tani ka vlerë rreth 3.5 miliard euro. Më shumë se 20% e eksporteve të naftës së Irakut kalon nëpër portin turk të Cejhanit.

Një tjetër çështje në axhendën e Gul, raporton Reuters, është ndarja e ujit nga lumenjtë Tigër dhe Eufrat që burojnë në Turqi por rrjedhin nëpër Irak.