Hymni kombëtar i BiH merr tekstin pas vitesh pritjeje

23/02/2009

Pas gati dhjetë vjet debatesh, hymni kombëtar i Bosnje dhe Herzegovinës ka tekstin e tij.

Nga Ema Kovaç për Southeast European Times në Sarajevë -- 23/02/09

Një nga kriteret kryesorë ishte që të gjithë shtetasit e BiH të mund të identifikoheshin me tekstin. [Getty Images]

Komisioni për zgjedhjen e tekstit të hymnit kombëtar të Bosnje dhe Herzegovinës (BiH) paraqiti tekstin fitues, të zgjedhur njëzëri nga të 11 anëtarët e jurisë, në një konferencë shtypi të premten (20 shkurt) në Sarajevë.

Teksti pret tani miratimin nga këshilli i ministrave dhe parlamenti i BiH.

"Jedna si jedina" ("Një dhe i vetmi") ishte hymni nga 1992 më 1998. Muzika erdhi nga një këngë e vjetër folklorike boshnjake. Muzikanti boshnjak Edin Dervishalidoviç shkroi fjalët.

Popullsitë kroate e serbe në BiH, megjithatë, gjithnjë e lidhi këngën me bashkësinë boshnjake, duke e gjykuar atë si një instrument të dështuar për nxitjen e unitetit kombëtar.

Më 1998, zyra e përfaqësuesit të lartë në BiH nisi një konkurs të hapur për një hymn tjetë. Dhoma e Përfaqësuesve e BiH zgjodhi në shkurt 1999 "Intermexo" të Dushan Shestiç, një kompozitor dhe profesor i violinës nga Banja Luka.

Megjithatë, projektligji për hymnin u shua në Dhomën e Popujve të BiH, duke rënë viktimë e një debati të zgjatur rreth tekstit. Në qershor 1999, i inatosur, Karlos Vestendorp, përfaqësuesi i lartë në BiH atë kohë, e vuri "Intermexo" si hymn, ndonëse vetëm si melodi.

Këshilli i ministrave i BiH vendosi në mars 2008 që t'i japë fund kësaj gjendje dhe vuri një shpërblim 15,600 euro për tekstin më të mirë. Konkursi tërhoqi 339 tekste.

Një nga kriteret kryesorë ishte që të gjithë shtetasit e BiH të mund të identifikoheshin me tekstin. Teksti fitues përbën një shkrirje të propozimeve të dy finalistëve: Shestiç, kompozitorit të muzikës së himnit dhe Benjamin Isoviç, një muzikant i Sarajevës.

Poezia përqëndrohet në shembujt e bukurisë natyrore të vendit dhe në të ardhmen e përbashkët të bashkësive të tij, duke përmendur "Atdheun Bosnje", "qiejtë blu të Herzegovinës" dhe "Krajinën krenare" një pas një. "Ne shkojmë së bashku drejt së ardhmes" është vargu i fundit.

Faqja në internet Sarajevo-x anketoi përdoruesit e tij mbi cilësinë e tekstit. Deri të hënën, u përgjigjën 1,060 vetë: 32% thanë se ishte i shkëlqyer, 42% mesatar dhe 26% i dobët.