Garë e ngushtë parlamentare në Rumani

01/12/2008

Me asnjë nga pretenduesit që siguruan një mandat të qartë, javët që vijnë kanë gjasa të shohin negociata të dendura mbi formimin e një qeverie të re.

Nga Paul Kiokoiu për Southeast European Times në Bukuresht – 01/12/08

Kreu i Partisë Social Demokratike (PSD) Mirçea Geoana shpalli fitoren të dielën, por gara mbetet e ngushtë dhe janë të mundëshme skenarë të ndryshëm qeverisës. [Getty Images]

Rumunët shkuan në votime të dielën (30 nëntor) për zgjedhjet e gjashta parlamentare të vendit që nga fundi i komunizmit. Këto qenë zgjedhjet e para nën një sistem uninominal në të cilat votuesit mund të zgjidhnin kandidatët individualë në vend të listave të partisë.

Deri të hënën në mëngjes, rezultatet paraprake nga Zyroja Qendrore e Zgjedhjeve treguan se koalicioni i Partisë Social Demokratike (PSD) dhe Partisë Konservatore (PC) rifitoi kryesimin e vet ndaj Demokratëve Liberalë (PDL). Më parë, PDL kishte dalë përpara me një diferencë të vogël.

Me 92.73% të votave të numëruara, aleanca PSD-PC kishte 33% të votave, ndjekur nga PDL me 32.57%. Partia Kombëtare Liberale (PNL) e kryeministrit Kalin Popesku Tarikeanu ishte e treta me 18.32%.

Në senat, PSD-PC kishte 33.99% ndjekur nga PDL me 33.79% dhe PNL me 18.49%. Bashkimi Demokratik i Hungarezëve (UDMR) ndërkohë pritet të mbledhë midis 6.2 dhe 6.4% të votave në të dy dhomat.

Kreu i PSD Mirçea Geoana deklaroi fitoren të dielën natën, duke thënë se Rumania kishte "dhënë një mesazh". Ai ftoi partitë e tjera të negocionin formimin e një kabineti.

Zgjedhjet u bënë një ditë pas festës kombëtare të Rumanisë, Ditës së Bashkimit dhe pjesëmarja ishte shumë e ulët, në 39,26%. Shumë njerëz nga qytetet kishin ikur për pushimet tre-ditore, gjë që mund ta ketë shkurtuar ndjeshëm pjesëmarrjen. Sistemi i ri votues nuk lejon votimin jashtë distriktit zgjedhor.

Bazuar në garën e ngushtë, ka më shumë se një skenar të mundshëm për qeverinë e ardhëshme. Më e sigurtë është një aleancë midis PSD dhe PNL, ndoshta me Geoanën si kryeministër.

Megjithatë, PNL mund të vendosë të shkojë me PDL e cila është e lidhur me presidentin Trajan Bashesku. Ish ministri i brendshëm Vasile Blaga del si një kryeministër i mundshëm në këtë skenar. Bashkëpunimi i mëparshëm i këtyre partive u prish pas një grindjeje personale midis Basheskut dhe Tarikeanut.

Opsioni më pak i besueshëm do të ishte një aleancë midis PSD dhe PDL. Të dy partitë janë të kundërvëna ashpër dhe ish kreu i PSD Ion Iliesku tashmë e ka përjashtuar këtë mundësi.

Ndërkohë, Partia nacionaliste e Rumanisë së Madhe, nuk ja doli të futet në parlament duke rënë nën pragun e 5%.