PIC kërkon zbatimin e shpejtë në BiH të marrëveshjes së Odzakut

21/11/2008

Bordi drejtues i Këshillit të Zbatimit të Paqes për BiH përfundoi të enjten një takim dy-ditor. Midis shqetësimeve që theksoi ishte nëvendnumëroja e reformave të vendit.

Nga Jusuf Ramadanoviç për Southeast European Times në Sarajevë -- 21/11/08

"[Takimi] shënoi fillimin e diskutimit rreth angazhimit të ardhshëm të kumunitetit ndërkombëtar në Bosnje dhe Herzegovinë," tha Përfaqësuesi i Lartë në BiH, Miroslav Lajçak. [OHR]

Bordi drejtues i Këshillit të Zbatimit të Paqes (PIC) për Bosnje dhe Herzegovinën (BiH) u takua këtë javë në Bruksel për të diskutuar gjendjen aktuale politike në BiH. Shqetësimi kryesor i bordit shprehur në fund të sesionit të enjten (20 nëntor) ishte stanjacioni i përgjithshëm i reformave, në rrugën e vendit për integrimin evro-atllantik.

Krerët politikë të PIC shprehën "një shqetësim të thellë lidhur me zhvillimin e situatës politike" gjatë katër muajve të fundit, për shkak të ngadalësimit të ritmit të reformës dhe retorikës nacionaliste të përdorur nga disa politikanë.

Ndonëse këshilli shprehu mbështetje për marrëveshjen politike të arritur në 8 nëntor në qytetin verior boshnjak Odzak, midis tre krerëve të partive kryesore politike të BiH, ai nënvizoi nevojën e zbatimit të kësaj marrëveshjeje. Përveç kësaj, praktika e diskutimit të integritetit territorial të BiH dhe ekzistenca e njësive të vendit duhet të ndalet, tha ai.

Ndihmës seketari i shtetit të SHBA për çështjet e Evropës dhe Evroazisë, Daniel Fried dhe ambasadori i SHBA në BiH, Charles English u takuan gjithashtu me politikanët gjatë sesionit të PIC. Ata u takuan më vete me kryeministrin e Republika Srpska Milorad Dodik i cili kryeson Aleancën për Social Demokratët e Pavarur, presidentin e Partisë së Veprimit Demokratik, Sulejman Tihiç dhe kreun e Bashkimit Demokratik Kroat të BiH, Dragan Çoviç, për të diskutuar gjendjen e tanishme politike.

Fried dhe English përsëritën mbështetjen e departamentit të shtetit të SHBA për marrëveshjen e Odzakut dhe kërkuan zbatimin e menjëhershëm. Sipas raporteve të medias, krerët e BiH thanë se reforma e kushtetutës së vendit është një përparësi thelbësore tamam tani.

Ndonse pati zëra se sesioni i PIC do të jepte opsione të përcaktuara për mbylljen e Zyrës së Përfaqësuesit të Lartë (OHR) në BiH, në vend të kësaj PIC tha se do ta mbajë OHR si mbikqyrës deri sa BiH të kryente reformat e nevojshme.

Në mënyrë të veçantë, PIC vuri në dukje pesë objektiva dhe dy kushte që përshkroi më parë këtë vit si një parakusht për mbylljen e OHR: ai theksoi veçanërisht nevojën për të përcaktuar statusin e Brckos dhe për të ndarë pasuritë e shtetit e të ushtrisë. PIC tregoi gjithashtu shqetësim rreth vonesës në miratimin e një strategjie për të procesuar krimet e luftës në BiH.

"[Takimi] shënoi fillimin e diskutimit rreth angazhimit të ardhshëm të kumunitetit ndërkombëtar në Bosnje dhe Herzegovinë," tha pas takimit Përfaqësuesi i Lartë Miroslav Lajçak.

Takimi tjetër është caktuar për në mars 2009 në Sarajevë.