Shkupit i kërkohet të shmangë problemet e zgjedhjeve, të përmirësojë dialogun politik

10/11/2008

Një raport i ri i KE i jep meritën Maqedonisë për përparimin në fushat kyçe por sinjalizon shqetësim mbi parregullsitë në zgjedhjet.

Nga Goran Trajkov për Southeast European Times në Shkup – 10/11/08

Ambasadori i BE në Maqedoni Ervan Fuere paraqiti raportin në media në 5 nëntor. [Tomislav Georgiev]

Raporti vjetor i Komisionit Evropian (KE) mbi vendet kandidate, lëshuar javën e fundit, vë në pah përparimin e Maqedonisë në rregullimin e ekonomisë, policisë dhe sistemit gjyqësor. Megjithatë, ai fajëson vendin për parregullsitë në zgjedhje, mungesën e dialogut politik dhe një dështim të mosarritjes së konsensusit në çështjet kyçe.

Maqedonia ka treguar përparim në disa nga tetë provat e vëna nga BE, tha komisioneri i zgjerimit të BE, Olli Rehn. "Ne ju japim ju meritën e plotë për këtë. Por për ne, parregullsitë serioze gjatë procesit zgjedhor qenë një e papritur negative."

Erik Mayer, raportuesi për Maqedoninë në Parlamentin Evropian, sugjeroi se KE ka qenë tepër e ashpër me vendin. Ai tha se problemet e zgjedhjeve nuk duhet të përbëjnë një pengesë për fillimin e negociatave.

Por Rehn nuk ishte në një mendje, duke thënë se çështja është themelore. "Vëzhguesit ndërkombëtarë dhe OSBE thanë se zgjedhjet nuk u kryen sipas kritereve dhe kjo është një kërkesë bazë. Po, unë thashë se ka një përmirësim, por ne do të na duhet të shohim që zgjedhjet e vitit të ardhshëm të mbahen në përputhje me standardet ndërkombëtare."

Kryeministri maqedonas Nikola Gruevski tha se qeveria e tij ka një strategji për trajtimin e problemeve të përmenduar nga KE. Ai shtoi se ndërsa raporti ishte ndoshta realist, Shkupit i duhet të kryejë më shumë analiza përpara se të mund ta vlerësojë atë plotësisht.

"Gjithsesi, ne do të themi se raporti është i mirë," tha Gruevski. "Po të përgjigjemi me të kundërtën, do të kemi një problem."

Ambasadori i BE në Maqedoni Ervan Fuere tha se nga 33 fusha, BE gjen përparim të mirë në 12 prej tyre dhe përparim të dobët në pesë. Në të tjerat ka patur përparim por duhen reforma më të thella.

"Qeveria duhat ta konsiderojë raportin dhe të punojë në drejtim të arritjes së konsensusit politik dhe gjithashtu të përmbushjes së kritereve," tha Fuere. "Opozita duhet të punojë së bashku me qeverinë me qëllim që të eliminojë vërejtjet negative. Kjo është një përgjegjësi kolektive, gjithkush duhet të punojë me qëllim që të përmbushen kriteret e integrimit në BE."

Sa për mosmarrëveshjen e emrit me Greqinë, Rehn tha se nuk është pjesë e paketës negociuese për pranimin në BE. Ai megjithatë inkurajoi të dy palët të kërkojnë një zgjidhje të shpejtë.