Vriten dy gazetarë kroatë nga bomba në makinë

24/10/2008

Ivo Pukaniç, pronari i një të përjavëshmeje kryesore politike kroate dhe drejtori i marketingut të gazetës, Niko Franjiç, u vranë nga një bombë makine në Zagreb të enjten, i fundit në një seri incidentesh të dhunshme në vend.

(Euronews, EurActiv, Javno.hr - 24/10/08; AP, Reuters, AFP, DPA, BBC, B92, Committee to Protect Journalists, Javno.hr - 23/10/08)

Një makinë urgjence arrin ndërsa policët sigurojnë zonën të enjten (24 tetor) pas një shpërthimi bombe makine në Zagreb. [AFP]

Kroacia do të ngrihet kundër terrorizmit dhe krimit të organizuar, u zotuan të enjten (23 tetor) krerët e vendit pas vrasjes së një gazetari të shquar. Ky ishte i fundit në një rradhë incidentesh të dhunshme që kanë tronditur vendin.

Një shpërthim nën veturën e tij vrau Ivo Pukaniç, 47 vjeç, pronari i së përjavshmes kryesore politike kroate Nacional, jashtë zyrave të gazetës në qendër të Zagrebit. Shpërthimi rreth orës 6:30 pasdite vrau gjithashtu drejtorin e marketingut të së përjavshmes, Niko Franjiç. Dy kalimtarë thuhet se morën plagë.

"Kroacia do të jetë edhe më e vendosur dhe e ashpër në trajtimin e krimit të organizuar dhe terrorit," tha kryeministri Ivo Sanader të enjten mbrëma. "Ne nuk do të lejojmë që Kroacia të bëhet një tjetër Beirut."

Sulmi i së enjtes erdhi në më pak se tre javë pasi një i armatosur vrau Ivana Hodak, vajzën 26 vjeçare të një avokati të shquar, në mes të ditës, pranë një zyre policie në Zagreb.

Duke dënuar vrasjen e Pukaniç, presidenti Stipe Mesiç thirri një sesion urgjent të Këshillit të Sigurisë Kombëtare për të premten, duke thënë se "Terrorizmi është bërë një fakt në rrugët e kryeqytetit."

"Tani është ose ne ose ata: shteti mbi bazë ligji apo kriminelët, terroristët dhe mafia," tha Mesiç në një deklaratë duke ju kërkuar autoriteteve të vepronin shpejt dhe me energji.

Tregimi i aftësisë për të luftuar krimin e organizuar dhe korrupsionin është një nga kërkesat kyçe që vendet duhet të përmbushin për t'u bashkuar me BE. Kroacia shpreson të hyjë në Bashkim si vendi i 28 anëtar në 2011.

Disa druhen se përshkallëzimi i dhunës mud të cënojë përpjekjn e vendit për në BE.

Davor Butkoviç, një redaktor i së përditshmes popullore Jutarnji List i tha Reuters se vrasja e dyfishtë ishte një "goditje e madhe për sistemin politik të Kroacisë".

Duke shprehur shqetësim rreth këtij përshkallëzimi dhune, një organizëm vëzhgues i medias me bazë në Nju Jork ndërkohë i kërkoi Zagrebit të garantojë që ata që janë pas incidentit të së enjtes të përballen me drejtësinë.

"Autoritetet kroate duhet të ngrenë një hetim tërësor dhe t'i sjellin me të shpejtë ata që janë përgjegjës për këto vrasje patra drejtësisë," thoshte në një deklaratë Komiteti për Mbrojtjen e Gazetarëve.

Sanader tha se ekspertët kryesorë të vendit do të punojnë mbi vrasjen e Pukaniç dhe raste të tjera të pazgjidhura.

"Kjo nuk është më thjesht një luftë kundër krimit të organizuar," tha kryeministri. "Kjo është diçka që të gjithë ne në Kroaci duhet të ngrihemi kundër."

Pukaniç ishte njëherazi i rëndësishëm e polemik. Gazeta e tij luftonte korrupsionin dhe abuzimet e të drejtave të njeriut, duke fituar disa çmime. Por ai gjithashtu ishte kritikuar për lidhjet e tij të ngushta me disa politikanë dhe një bos të dyshuar të krimit të organizuar.

Pukaniç mori mbrojtje policore pasi i shpëtoi një orvatje ndaj jetës së tij në prill. Megjithatë, dy muaj më parë, mbrojtja ju hoq me kërkesën e tij, tha të enjten ministri i brendshëm kroat Tomislav Karamarko.