Aktorja e SHBA viziton Kosovën për të rritur ndërgjegjësimin për kancerin e grave

16/10/2008

Artistja e Hollivudit Fran Dreshçer vizitoi Kosovën për të kërkuar një luftë të ashpër kundër kancerit të grave.

(Ambasada e SHBA në Prishtinë -- 16/10/08; Women's eNews)

E dërguara e departamentit të shtetit të SHBA për çështjet e shëndetit të grave, Fran Dreshçer shkoi në Kosovë të ngrejë ndërgjegjësimin për kancerin. [Laura Hasani]

Gratë duhet të marrin përgjegjësi për shëndetin e tyre dhe luftën e kancerit, tha aktorja e SHBA Fran Dreshçer në një vizitë dy-ditore në Kosovë javën e shkuar.

"Kosova, si një shtet i ri, duhet të përqëndrohet në ngritjen e ndërgjegjësimit të grave lidhur me këtë sëmundje sepse është më e kollajtë dhe më e lehtë të trajtojhet një kancer i kapur herët," tha Dreshçer që kaloi nga 7 tetor në 9 tetor në Kosovë si një e dërguar e departamentit të shtetit të SHBA për çështjet e shëndetit të grave.

Ajo po përfaqësonte gjithashtu Nismën e Kancerit të Gjirit të Ballkanit, një partneritet i ngritur vitin e kaluar 2007 nga institucionet e asaj kohe të Zyrës së SHBA në Prishtinë dhe institucionet shëndetësore e krerët e Kosovës.

"Jam seriozisht e shqetësuar rreth të drejtave të grave...Gratë duhet të marrin nën kontroll shëndetin e tyre," tha ajo pas një takimi me anëtaret e grupit parlamentar Gratë e Kosovës, të cilave u kërkoi të bënin më shumë për luftën kundër kancerit.

Dreshçer vetë mposhti kancerin e mitrës. "M'u deshën dy vjet dhe tetë mjekë të ndryshëm për të trajtuar kancerin siç duhej," tha ajo duke u kërkuar grave të bënin kontrolle me qëllim që të garantonin zbulim të shpejtë të çfardo zhvillimi malinjë.

Më shumë e njohur për lojën në seritë komike të TV të SHBA, Dadoja, Dreshçer kishte një itinerar të ngarkuar gjatë vizitës së saj të shkurtër në vendin e ri. Ajo u intervistua nga dhjetë degë të medias, duke përfshirë disa që shërbenin në tregun serb kosovar dhe bëri një parathënie për një dokumentar mbi shëndetin e grave që u transmetua në TV Kosova në 8 tetor. Ajo u takua me Grupin e Grave të asamblesë së Kosovës dhe me gratë e reja serbe në Mitrovicën veriore.

Dreshçer përfundoi qëndrimin e saj në Kosovë me një vizitë në kampin Bondstil ku takoi trupat që ose kishin shpëtuar nga kanceri ose kishin patur anëtarë të familjes me kancer.

Neglizhimi i shëndetit të grave është një çështje serioze në Kosovë, ku gratë me probleme mjekësore duhet të luftojnë një kombinim të pengesave ekonomike e sociale.

Me ndoshta tre makina të besueshme mamogramash në tërë vendin, rrushfetet e vonesat e shfrenuara në sektorin shëndetësor publik dhe kujdesin mjekësor privat tepër të shtrenjtë për shtetasit e mesëm të Kosovës, pacientet femra priren ta zbulojnë kancerin e tyre vonë, kur trajtimi është më i vështirë dhe me më pak gjasa për të shpëtuar. Përveç kësaj, disa paciente i trëmben kirurgjisë ose janë tepër të drojtura për të pranuar se kanë kancer të gjirit.

Mjeku kosovar Avdyl Krasniqi beson se gjendja e kancerit të gjirit është "ndoshta" më keq se në BE, ku sëmundja është shkaku i dytë kryesues i vdekshmërisë së grave dhe prek një në çdo dhjetë gra. Vendit i mungon një regjistër kanceri për të dhënë statistikore për krahasim.

Në këtë artikull kontribuoi Blerta Foniqi-Kabashi.