BE ngrin miliona para ndihmë për Bullgarinë lidhur me korrupsionin

24/07/2008

Komisioni Evropian pezulloi rreth gjysmë miliard euro ndihmë për Bullgarinë të mërkurën duke përmendur mosmenazhimin siç duhet dhe mosmarrjen efektivisht me korrupsionin e shfrenuar dhe krimin e organizuar.

(FT, The Guardian, Independent - 24/07/08; AFP, AP, Reuters, DPA, Euobserver, Dnevnik, Mediapool, Europe.bg, SNA, European Commission - 23/07/08)

Komisioni Evropian ngriu të mërkurën (23 korrik) qindra miliona euro ndihmë për Bullgarinë. [Dosje]

Komisioni Evropian (KE) ngriu të mërkurën (23 korrik) rreth 500 milion euro ndihmë për Bullgarinë duke përmendur dobësitë e sistemeve të kontrollit të vendit dhe rastet e përvetësimit dhe të parregullsisë. Ai gjithashtu tërhoqi akreditimin e dy agjensive qeveritare të ngarkuar me zbatimin e fondeve nën programin e para-pranimit PHARE.

Një raport i KE mbi menazhimin e fondeve të BE në Bullgari, lëshuar të mërkurën në Bruksel, thoshte se "dobësia kritike në aftësinë administrative dhe gjyqësore" nuk e lejoi vendin "të korrte përfitimet e plota" të ndihmës së huaj.

"Mungesa e përgjegjësisë dhe transparencës në prokurimin publik kur tenderohen fondet e BE është një problem i rëndë," lexohej në dokumentin e pashembullt.

Duke tërhequr akreditimin e agjensive efektivisht ngrijnë rreth 250 milion euro që kishin për qëllim të përmirësonin institucionet bullgare. Përveç kësaj, u pezulluan 115 milion euro për infrastrukturën dhe 121 milion euro për zhvillimin rural, tha zëdhënësi i KE Mark Grej.

Që nga bashkimi i saj me BE, bashkë me Rumaninë 18 muaj më parë, Bullgaria ka parë më tepër se 800 milion euro të mbajtura nga zyrtarët skeptikë të BE.

"Sapo Bullgaria të marrë masat e nevojshme korigjuese ...Komisioni është përgatitur të kthejë" tërheqjen e akreditimit të agjensive, thoshte KE.

Në qoftë se Bullgaria nuk ja del të kënaqë KE përpara dhejtorit, ajo do të humbasë në mënyrë të pakthyeshme 556 milion euro, citoi Reuters të thoshin zyrtarët.

KE lëshoi gjithashtu dy raporte ku kritikohej përparimi i Bullgarisë dhe Rumanisë në reformën gjyqësore dhe luftën kundër korrupsionit.

Reuters tha se studimet përmbanin kritikën më të ashpër që ka patur ndonjëherë KE ndaj një vendi anëtar.

"Lufta kundër nivelit të lartë të korrupsionit dhe krimit të organizuar nuk po jep rezultatet e duhura," tha Johanes Laitenberger, kreu i zyrës së shtypit të KE.

Sipas KE, Bullgaria jep statistika të pabesueshme. Ai kritikoi gjithashtu vendin për dështimin e ngrirjes së pasurive financiare të fituara ilegalisht dhe për të rregulluar financimin e partive politike.

KE i kërkoi Bullgarisë të ndërmarrë hapa të menjëherëshme për të forcuar zbatimin e ligjit dhe të gjyqësorit. Sofia, thoshte ai, duhet të rritë transparencën dhe të frenojë konfliktet e interesit.

"Një strategji e qartë dhe një vendosmëri pamëdyshje ...janë të nevojshme për të reformuar sistemin," thoshte raporti, duke shtuar se Bullgaria duhet "të merret bindshëm me lidhjet e dyshuara midis një pjese të klasës politike, biznesit dhe krimit të organizuar".

Kryeministri Sergej Stanishev i quajti raportet objektive dhe tha se qeveria do t'i drejtohet mangësive. "Unë do të kërkoj masa konkrete," tha ai.

Vetëm disa orë përpara daljes së raporteve, pesë parti të opozitës së krahut të djathtë në parlament bënë një mocion të ri mosbesimi duke përmendur "korrupsionin e madh", paaftësinë dhe mospërputhjen me rregullat e BE.

Koalicioni qeverisës gëzon një shumicë të rehatëshme parlamentare dhe pritet gjerësisht t'i shpëtojë votimit të gjashtë të mosbesimit.