Kosova mbledh më tepër se 1 miliard euro në konferencën e donatorëve

15/07/2008

Donatorët ndërkombëtarë u zotuan për 1.2 miliard euro për Kosovën të premten. Fondet do të shkojnë drejt zhvillimit social e ekonomik dhe për të paguar borxhet e vendit të pavarur rishtazi.

Nga Blerta Foniqi-Kabashi për Southeast European Times në Kosovë -- 15/07/08

Shumica e parave do të mbështesë zhvillimin social e ekonomik. [AFP]

Komuniteti ndërkombëtar u zotua për 1.2 miliard euro për Kosovën në konferencën e donatorëve të premten (11 korrik) në Bruksel. Fondet, gjatë tre viteve të ardhshme, do të ndihmojnë ndërtimin e Kosovës, vendi më i ri i dalë nga shpërbërja e Jugosllavisë.

Shumica e parave të zotuara të premten do të mbështesin financiarisht zhvillimin social e ekonomik, siç është ndërtimi i rrugëve dhe shkollave. Rreth 100 milion euro do të shkojnë për borxhin e Kosovës.

Rreth 40 vende dërguan përfaqësues në konferencën të cilën e organizoi Komisioni Evropian dhe që u ndoq nga kryeministri i Kosovës Hashim Thaçi. Banka Botërore ishte midis institucioneve ndërkombëtare të pranishme.

Thaçi i tha konferencës se veprimtaria përfaqësonte fillimin e një faze të re zhvillimi dhe se autoritetet në Prishtinë do të bashkëpunojnë me donatorët ndërkombëtarë kur të vijë puna te shpenzimi i parave.

"Ne jemi shumë të ndërgjegjshëm për përgjegjësitë tona," tha Thaçi. "Ne nuk do t'u zhgënjejmë kurrë ju."

Komisioni Evropian doli si donatori i vetëm më i madh, duke bërë një zotim 500 milion euro, pasuar nga Shtetet e Bashkuara me 265 milion euro.

"Konferenca e donatorëve për të mbështetur Kosovën ishte një ngjarje shumë e rëndësishme," tha zëvendës ndihmësja e sekretarit të shtetit të SHBA, Rosmari DiKarlo.

Komisioni Evropian dhe donatorët e tjerë kanë treguar gadishmëri për të mbështetur zhvillimin ekonomik dhe demokratik të Kosovës, tha DiKarlo por donatorët prisnin që Prishtina të përmbushte shpresat e tyre.

"Ne jemi shumë të gëzuar sepse...shumë vende evropiane vendosën të mbështesin Kosovën në të ardhmen. Ne e konsiderojmë këtë të ketë një rëndësi absolutisht thelbësore për stabilitetin e rajonit," tha DiKarlo.

Komisioneri i zgjerimit të BE, Olli Rehn i cili gjithashtu ndoqi konferencën, tha se Kosova është "kryekëput një çështje evropiane" dhe se duke premtuar gjysmë miliardi euro, "BE e ka demonstruar qartë këtë."

"Kjo nuk është thjesht fjalor dipolomatik; është më konkrete, prova më e prekshme e përkushtimit tonë ndaj Kosovës dhe stabilitetit e përparimit të krejt Ballkanit Perëndimor," tha Rehn.

Pothuajse të gjithë 20 vendet e BE që tashmë e kanë njohur Kosovën si vend të pavarur u zotuan për fonde. Por sasitë e angazhuara nga kryesorët e BE shkonin prej 100 milion euro nga Gjermania tek 2 milion euro zotuar nga mbajtësja e tanishme e presidencës së BE, Franca.

Vendet jo të BE, Norvegjia, Zvicra, Arabia Saudite dhe Turqia kontribuan gjithashtu me sasi të mëdha.