Kosova nuk do të ketë ushtri, thotë de Hoop Shefer

24/06/2008

"KFOR është këtu; ai është këtu për të qëndruar," tha shefi i NATO-s Jaap de Hoop Shefer gjatë një vizite në prishtinë të hënën.

Nga Blerta Foniqi-Kabashi për Southeast European Times në Prishtinë -- 24/06/08

Shefi i NATO-s Jaap de Hoop Shefer (në mes) dhe komandanti i KFOR gjenerali Ksavie Bu dë Marnhak (djathtas) në Prishtinë të hënën (23 qershor). [Laura Hasani]

Sekretari i përgjithshëm i NATO-s Jaap de Hoop Shefer njoftoi të hënën (23 qershor) në Prishtinë se Forca e re e Sigurisë së Kosovës, më tepër se të jetë një ushtri, do të ketë "detyra specifike".

"NATO do të drejtojë transformimin e Trupave të tanishme të Mbrojtjes së Kosovës dhe krijimin e Forcave të Sigurisë së Kosovës që do të ketë 2,500 anëtarë dhe rreth 800 anëtarë rezervë me detyra të posaçme," tha de Hoop Shefer në një konferencë shtypi në Prishtinë pas takimit me presidentin Fatmir Sejdiu, kryeministrin Hashim Thaçi dhe kryetarin e parlamentit Jakup Krasniqi.

De Hoop Shefer spjegoi se vendimi për personelin erdhi nga NATO. "Unë besoj se ne do të kemi një forcë shumëetnike nën mandatin e KFOR," parashikoi ai.

Ai vuri në dukje se në qoftë se situata bëhet e brishtë, NATO do të riforcojë misionin e vet në Kosovë. Ai e përshkroi detyrën e KFOR me 16,000 forca si garanci për paqen dhe sigurinë si për komunitetet e shumicës dhe të pakicës.

"KFOR është këtu; ai është këtu për të qëndruar. KFOR ka një mandat dhe trupat e duhura dhe në qoftë se është e nevojshme, KFOR ka riforcime," tha de Hoop Shefer.

Sa për misionin e ri civil ndërkombëtar në Kosovë, shefi i NATO-s tha se ai kërkonte për bashkëpunim midis OKB dhe BE ashtu dhe me NATO. "Këtë herë, është shumë e rëndësishme të ketë bashkëpunim midis të gjitha organizatave ndërkombëtare," tha ai.

"Unë kam besim se pas këtyre bisedimeve, ne do të kemi një marrëdhënie më të mirë," vazhdoi ai, duke shtuar se më së fundi stafi i UNMIK do të reduktohet dhe është e rëndësishme që KFOR mbetet nën mandatin e vet duke punuar me të tjera organizata.

Nga ana tjetër, ai kundërshtoi perspektivën e një Kosove të ndarë, duke thënë "çdo formë ndarjeje nuk është një opsion".

De Hoop Shefer tha se forcat paqerruajtëse të kryesuara nga NATO në Kosovë do të vazhdojnë të punojnë brenda pushtetit të tyre të përcaktuar nga rezoluta 1244 e Këshillit të Sigurimit.

Ai e përshkroi pozitën e NATO-s në statusin e Kosovës, si neutrale. "Njohja nuk është puna jonë. Ne kemi anëtarë të NATO-s që e kanë njohur Kosovën dhe anëtarë që nuk e kanë njohur, por ajo që është e rëndësishme të dihet është se të gjithë aleatët e NATO-s janë në KFOR dhe do të qëndrojnë atje," tha de Hoop Shefer.