Ndezin debat klasat e fesë në programin e kopështeve të fëmijëve në BiH

19/05/2008

Klasat e kopështeve të fëmijëve në Bosnje dhe Herzegovinë mund të ndahen në klasa islamike dhe jo-islamike në qoftë se miratohet plani i ministrisë.

Nga Azra Martin për Southeast European Times në Sarajevë – 19/05/08

Fëmijët e kopështeve të Sarajevës mund të ndahen në klasa islamike dhe jo-islamike. [Getty Images]

Një plan nga autoritetet arsimore në Sarajevë për të futur klasat e fesë në kopështet e fëmijëve ka ndarë publikun midis atyre që mendojnë se është një e drejtë fetare dhe atyre që e shohin këtë si një kërcënim për shumë-etnicitetin.

Një pjesë e madhe e popullsisë së Sarajevës është boshnjake muslimane. Prindërit e fëmijëve boshnjakë u anketuan nga kreu i Fëmijëve të Sarajevës, Arzija Mahmutoviç rreth shtimit të klasave të islamit në program. Mahmutoviç është përgjegjës për 24 kopështe publike fëmijësh në kryeqytet.

Megjithatë, prindërit jo-fetarë nuk janë dakord me planin dhe kanë nisur qarkullimin e një peticioni nën parullën "Stop ndarjes fetare në kopështet e fëmijëve".

"Unë nuk dua t'i spjegoj djalit tim tre-vjeçar Sven, që i pëlqen [shoqja e tij e klasës] Esma, pse ata befas duhet të rrinë në klasa të ndryshme. Askush nuk ka të drejtë t'i ndajë ata," shkruante Vedrana Pinjo-Neushul, një boshnjake muslimane martuar me një çifut. Peticioni ka marrë rreth 5,000 nënshkrime.

Shumë partnerë islamikë në Sarajevë thonë se peticioni përfaqëson "një kulm të fushatës anti-islamike".

Ministria e arsimit do të vendosë në se do të zbatojë të njëjtin model që ekziston në kolegje, klasat fetare si një opsion vullnetar, apo në se do ta kundërshtojë për të respektuar shumë-etnicitetin.

Debati po mbikqyret nga OSBE, e cila thotë se "arsimi në Bosnje dhe Herzegvinë duhet të jetë gjithpërfshirës, jo përjashtimor."

"Teorikisht nuk ka asgjë të keqe me këtë, përtej natyrisht shtimit të një subjekti në programin para-shkollor që shumica e ekspertëve do të qenë kundër, se nuk duhej nxënë deri sa nxënësit të bëheshin më të rritur. Ai ngre pyetje rreth përjashtimit dhe diskriminimit, pasi raportet sugjerojnë gjithashtu se instruksione të tilla do të jenë puro islamike në orientim."

"Në një vend shumë-etnik si BiH, kjo kërcënon të punohet kundër lirive bazë të garantuara nga kushtetuta e vendit. Përveç se kultivon dhe krijon këtë ndjenjë përkatësie midis shtetasve, pavarësisht nga raca, feja apo kultura, BiH ka pakë perspektiva për zënien e vendit të dëshëruar në familjen më të madhe evropiane të vendeve demokratike," thotë organizata.