Mbretëresha Elisabet II shpreh mbështetjen e MB për përpjekjen e Turqisë për në BE

14/05/2008

Përpjekja e Turqisë për t'u bashkuar me BE merr një nxitje mbretërore të martën ndërsa mbretëresha e Britanisë nis një vizitë katër-ditore në Turqi.

(Euobserver, The Times, Zaman, The New Anatolian, Hurriyet - 14/05/08; AP, AFP, DPA, BBC, VOA - 13/05/08)

Mbretëresha Elisabet II e Britanisë dhe presidenti turk Abdullah Gul u takuan të martën (13 maj) në Ankara. [Getty Images]

Duke theksuar vendosjen strategjike të Turqisë si një urë midis Evropës dhe Azisë, mbretëresha Elisabet II e Britanisë shprehu të martën (13 maj) mbrëma mbështetje për ofertën e Ankarasë për në BE, shpejt pasi nisi vizitën e saj të parë zyrtare në vend në 37 vjet.

"Për ne, Turqia është është aq e rëndësishme tani sa nuk ka qenë kurrë," tha monarkja britanike në një banket dhënë nga presidenti Abdullah Gul. "Turqia është vendosur në mënyrë unike si një urë midis Lindjes dhe Perëndimit në një kohë vendimtare për Bashkimin Evropian dhe botën në përgjithësi."

Britania është një nga mbështetësit e patundur të kërkesës për një kohë të gjatë të anëtarësimit në BE të Turqisë. Një anëtare e asociuar që nga 1963, Turqia nisi bisedimet e pranimit me bllokun 27-vendesh në tetor 2005, por vetëm gjashtë nga 35 kapitujt negociues janë hapur që atëhere. Bisedimet mbi tetë fusha të tjera politikash ngecën në fund të 2006 pasi Ankaraja refuzoi të hapte portet dhe aeroportet e saj për trafikun nga Qiproja, pjesa greke e së cilës u bashkua me BE në 2004.

Megjithë pengesat lidhur me pranimin që Turqia ndesh, publiku përfiton prej reformave që Brukseli kërkon nga kandidatët e BE, sipas monarkes britanike.

"Perspektiva e pranimit në Bashkimin Evropian ka ndihmuar tashmë të frymëzojë ndryshime që kanë përmirësuar jetën e shtetasve," tha ajo. Ajo e përshkroi gjithashtu Turqinë si një "demokraci të besueshme dhe dinamike" dhe vlerësoi Ankaranë për "rolin e vet në nxitjen e paqes, politikës së stabilitetit dhe zhvillimit ekonomik në disa nga zonat më me probleme të botës" dhe për lidhjet e ngushta me Londrën. Turqia dhe Spanja janë bashkëfinancues të një përpjekje të OKB për të rritur dialogun midis kulturave perëndimore e e jo-perëndimore.

Gul falenderoi Britaninë për "mbështetjen e saj të përherëshme e të palëkundur" për ofertën e vendit të tij për t'u bashkuar me BE. E shoqja e Gul, Hajrunisa mbante shallin e saj të kokës megjithë një ndalim për një gjë të tillë në zyrat qeveritare, duke përfshirë veprimtari të këtij lloji.

Mbretëresha Elisabet II që vizitoi më parë Turqinë në 1960 dhe 1971, arriti në Ankara të martën pasdite e shoqëruar nga i shoqi i saj, princi Filip dhe ministri i jashtëm Dejvid Milibend.

Shpejt pas arritjes së tyre, çifti mbretëror vizitoi mauzoleun e Mustafa Qemal Ataturkut, themelues i Turqisë moderne, ku mbretëresha vuri një kurorë lulesh.

Itinerari i tyre katër-ditor përfshin qytetin veriperëndimor të Bursës të mërkurën, një shkollë dhe një muze në Stamboll të enjten dhe një pritje në bordin e një anije lufte britanike të stacionuar pranë qytetit. Ata e lënë Turqinë të premten.

Nik Beird, ambasadori britanik në Turqi, u tha gazetarëve se udhëtimi mbretëror "thekson gjerësinë dhe thellësinë" e marrëdhënieve anglo-turke dhe "rëndësinë e Turqisë si për BE dhe për botën".