Këshilli i Evropës raporton mbi masat kroate ndaj pastrimit të parave

09/05/2008

Pronat e paluajtëshme dhe industria e ndërtimit janë objektiva të lehtë për ata që kërkojnë të pastrojnë para, paralajmëroi një komitet i Këshillit të Evropës.

Nga Natasha Radiç për Southeast European Times në Zagreb -- 09/05/08

"Kroacia do të bëjë gjithëshka të nevojshme për të miratuar dhe zbatuar kuadrin ligjor evropian në rastet kundër pastrimit të parave," tha kryeministri Ivo Sanader. [Getty Images]

Komiteti i Ekspertëve të Vlerësimit të Masave Kundër pastrimit të Parave dhe Financimit të terrorizmit (MONEYVAL) i Këshillit të Evropës, ka botuar raportin e vlerësimit të raundit të tretë mbi Kroacinë. Ai vlerëson zbatimin e standardeve evropiane dhe ndërkombëtare në luftën kundër pastrimit të parave dhe financimit të terrorizmit.

Qeveria mori një vlerësim të hollësishëm, duke diskutuar çdo përfundim së bashku me udhën e sugjeruar të veprimit në fushat ku përparimi ka qenë i papërshtatshëm.

Sipas ekspertëve të CoE, kuadrit ligjor të Kroacisë i mungojnë masat e zbatimit konkret. "Ka një mungesë efektshmërie dhe dëshire për të ndjekur rrënjët e 'parave të pista' dhe për të ndëshkuar ata që përpiqen të legalizojnë paratë e fituara paligjmërisht," thotë raporti.

"Autoritetet kroate nuk i kushtojnë mjaft vëmendje pastrimit të parave, i cili është përdorur për qëllime të ndryshme," shton ai. "Zona gri e pronës së paluajtëshme dhe industria e ndërtimit janë objektiva të lehtë për operacione të tilla. Megjithse institucionet kroate prodhuan ligjet e anti-pastrimit të parave dhjetë vjet më parë, ka patur vetëm dy gjyqe të tillë."

Dy faktorë, mbingarkimi i gjykatave dhe një mungesë përvoje, janë cituar si arsyet e mundëshme për vonesën e gjatë. Të dy problemet "duket të jenë të shërueshme nëpërmjet trainimit të duhur të gjyqësorit dhe prokurorisë", thonë autorët.

Ekspertët e CoE vlerësojnë se në 2005 Kroacia humbi 500,000 euro ndaj krimit të organizuar, ndërsa krimi ekonomik në përgjithësi i kushtoi vendit rreth 170 milion euro.

Përpjekjet për të goditur fondet e terroristëve kanë munguar gjithashtu, paralajmërojnë ekspertët. "Kroacisë do t'i duhet të bëjë më shumë për të trajtuar financimin terrorist në një mënyrë të kënaqëshme. Financimi i terorizmit është vetëm në një shkallë të kufizuar parashikuar si një shkelje ligjore e pavarur dhe për më tepër ligji parandalues aktualisjt i drejtohet parandalimit të financimit terrorist në një mënyrë të pamjaftueshme," thotë raporti.

Media kroate e përshkruan Kroacinë si një "skutë të sigurtë për pastrimin e parave". Qeveria ka për të lëshuar një përgjigje zyrtare. Kryeministri Ivo Sanader, megjithatë thotë përgjithësisht se Kroacia "do të bëjë gjithëshka të nevojshme për të miratruar e zbatuar kuadrin ligjor evropian, veçanërisht në rastet kundër pastrimit të parave."