Maqedonia përpiqet të bëjë të sajën ushqimin popullor të Ballkanit si pjatë kombëtare

07/02/2008

Qeveria e Maqedonisë po kërkon markën e autorësisë për ajvarin, një prodhim që gjendet anembanë rajonit.

Nga Zoran Nikolovski për Southeast European Times në Shkup - 07/02/08

Ajvar bëhet me speca të kuq dhe patëllxhane. [Qeveria maqedonaseç]

Ajvar është një salcë popullore e Evropës Juglindore bërë nga speca të kuq dhe patëllxhane që ndryshon pak nga rajoni në rajon dhe bëhet tradicionalisht në vjeshtë. Ndërsa gjendet në shumë vende, qeveria maqedonase po përpiqet të marrë autorësinë e prodhimit nën emrin e ri Ajvari Maqedonas.

Në qoftë se marka e autorësisë jepet nga Instituti për Pronën Industriale, marka do të merrte mbrojtje si një prodhim me një origjinë gjeografike. Maqedonia do të kërkonte atëhere mbrojtje ndërkombëtare nëpërmjet marrëveshjeve të ndërsjellta me vendet importuese, sipas ministrisë së bujqësisë.

Instituti megjithatë, thotë se një kompani sllovene ka kërkuar tashmë ta patentojë në Gjermani prodhimin. Orvatja dështoi sepse ajvarit ju dha një emër i përgjithshëm për një produkt që shtrohet mbi bukën dhe si i tillë nuk është subjekt i mbrojtjes së markës së autorësisë si pronë e një vendi.

Megjithatë, Shkupi po shkon përpara. "Qeveria maqedonase po përpiqet ta bëjë ajvarin një prodhim të njohur në botë," tha zëdhënësi i qeverisë Ivica Boçevski. "Emri do të lejonte që prodhimi të standardizohej me përbërësit dhe përgatitja e tij të renditej në etiketa. Kjo, nga ana e vet, do të garantonte cilësinë dhe konkurrencën në vend dhe në tregjet e botës."

Qeveria ka formuar një grup pune për të hartuar protokollin e standardizuar për përbërësit, recetën dhe prodhimin. Prodhuesve do t'u duhet të përputhen me rregullat e ashpra dhe të dërgojnë mostra të Fakultetin e Teknologjisë dhe Metalurgjisë një herë në vit për kontroll të cilësisë.

Autoritetet maqedonase pranojnë se ajvari prodhohet në shumë vende nën emra të ndryshëm. Megjithatë, në rastin e "Ajvarit Maqedonas", ata pretendojnë të kërkojnë mbrojtje për një varietet lokal, tradicional që ka patur cilësinë e tij të verifikuar nga institucione shtetërore.