Rezultatet jozyrtare shpallin Kuzmanoviç presidentin e ri të Republika Srpska

10/12/2007

Bashkimi i Social Demokratëve të Pavarur ka fituar zgjedhjet presidenciale të RS, sipas rezultateve paraprake. Rajko Kuzmanoviç zotohet të jetë president i të gjithë serbëve boshnjakë, pavarësisht nga partia apo etniciteti.

Nga Vlatko Vukotiç për Southeast European Times në Banja Luka - 10/12/07

Rajko Kuzmanoviç i Bashkimit qeverisës të Social Demokratëve të Pavarur hedh votën e tij të dielën (9 dhjetor). [Getty Images]

Rajko Kuzmanoviç ka fituar zgjedhjen presidenciale të Republika Srpska (RS) sipas rezultateve paraprake të njoftuara të hënën (10 dhjetor) nga Komisioni Zgjedhor i Bosnje dhe Herzegovinës.

Me 55% të votave të numëruara, Kuzmanoviç, anëtar i Bashkimit qeverisës të Social Demokratëve të Pavarur (SNSD) dhe kryetari aktual i Akademisë së Shkencave të RS, fitoi 45% të votave. Ognjen Tadiç i Partisë nacionaliste Demokratike Serbe (SDS) erdhi i dyti me 33%. Kreu i Partisë për Përparimin Demokratik (PDP) Mladen Ivaniç ishte i treti, me 16%, sipas Komisionit Zgjedhor.

Duke premtuar të jetë president i të gjithë serbëve boshnjakë, pavarësisht nga përkatësia politike, Kuzmanoviç tha: "Unë do të marr menjëherë detyrat presidenciale sipas kushtetutës dhe do të kryej detyrat e mija siç është përcaktuar në kushtetutë. Do të përfaqësoj republikën dhe do të mbroj unitetin e saj."

Kuzmanoviç duhet të presë të marrë këto detyra deri sa të shpallen rezultatet përfundimtare më pas këtë muaj.

Zgjedhjet e parakohshme u thirrën pasi presidenti i mëparshëm Milan Jeliç vdiq nga një goditje zemre në 30 shtator, më pak se një vit pasi kishte marrë postin.

"Është e qartë se asnjë parti nuk ka shumicën absolute më dhe se të tre partitë e kanë dalluar veten nga njëra tjetra, gjë që do të përcaktojë të ardhmen e skenës lokale politike," tha Ivaniç i PDP.

Si SDS dhe PDP thonë se nuk i shohin rezultatet si një humbje por si një rifitim të besimit të votuesve pas një humbjeje shumë më të madhe vitin e kaluar. "Ne kemi bërë gabime, por populli pa se ne jemi të aftë t'i ndreqim ato," tha Tadiç.

Zgjedhjet u shënuan nga një pjesëmarrje aq e ulët sa që habiti edhe më pesimistët. Komisioni Zgjedhor tha se vetëm 36% e 1.1 milion votuesve të Republika Srpska erdhën në votime, pjesëmarrja më e keqe e 12 vjetëve të fundit. Analistët thonë se kjo është sepse votuesit nuk janë më të interesuar se kush do të jetë president pasi ai është vetëm sa për figurë.

Kryeministri i RS Milorad Dodik tha se fitorja e Kuzmanoviç përfaqëson një fitore për demokracinë dhe për RS. Ai gjithashtu e konsideron fitoren e Kuzmanoviç të jetë një votë për besimin publik në qeverinë e SNSD.

"Institucionet e RS do të vazhdojnë të punojnë mbi programet e tyre pa pengesa. Është shumë e rëndësishme që ne ende kemi besimin e shtetasve gjë që konfirmon politikën e partisë sonë deri tani," tha Dodik.